Champions League-ah champion thar an awm dawn em?

Europe-a football inelna sang ber UEFA Champions League chu Zirtawpni zan hian khelh ṭan a ni dawn a, Covid-19 vangin inelna kalphung an thlak bawk nen champion thar awm thei dinhmunah an ding mek.

UCL-ah team 12 an la dam a, heng zingah hian team panga Real Madrid, Bayern Munich, Barcelona, Juventus leh Chelsea te chiah champion tawh an ni. Team dang pasarih Manchester City, Paris St-Germain, Atletico Madrid, Napoli, Atalanta, RB Leipzig  leh Lyon te hi la champion lo an ni thung.

Fixtures awm dan thlirin champion thar awmna 'chance' a sang hle. Quartefinal phel khatah la champion lo pali PSG, Atalanta, Atletico leh RB Leipzig te an awm. Heng zinga pakhat hian final an lut dawn a, final-ah chuan engpawh thleng thei tawh a ni.

Quarterfinal khing lemah lamah Champions League nomawi thupui bera neitu Pep Guardiola hote Manchester City an awm a, English club hian final an lut a nih ngat chuan champion thar an awm dawn tih a chiang ang.

Covid-19 vangin Champions League khelh dan kalphung a dang hlak a, knockout tournament a ni dawn. Europe inelna sang hi quarterfinal aṭangin single leg-in Lisbon, Portugal-ah khelh a ni dawn.

Ṭum dangah chuan double leg-a khelh ṭhin a ni a, minute 180 khelh ṭhin a nih avangin team ṭha zawk an dingchang tlangpui. Tun ṭumah erawh tawnhriat nei ṭha lo team tan pawh khualmuala khelh a ngai lo a, neutral ground-ah khelh a nih dawn avangin eng pawh thleng thei a ni.

Paris Saint Germain-in 2012–13 season aṭang khan Ligue 1 an thunun ṭan a, 2016-17 season-ah Monaco an champion ve zeuh tih loh chu nomawi an chawi vek. Covid-19 vangin kumin Ligue 1 an zo hma a, PSG hi an san fal avangin champion a tan an puang. 

French champion hian kil tinah player ṭha an kawl a, chanchin ṭha lo erawh Kylian Mbappe hliam vangin quarterfinal-a Atalanta an hmachhawn hunah a inlan thei lo. Uruguayan striker Edinson Cavani contract a tawp tawh avangin an chhawr thei lo bawk ang.

Amaherawhchu PSG hian tlarhmaah Neymar, Mauro Icardi, Angel Di Maria leh Eric Maxim Choupo-Moting te an la kawl. Brazilian star Neymar ringawt pawh hi champion pui tham a ni a, Barcelona forward hlui hian match 24 lekah goal 19 a khung tawh. 

Chutihrualin Neymar hi PSG-in pound maktaduai 200 an sen ngamna a ni a, a man en pawhin a ṭha ve tawk tih a hriat theih. Kum 28 mi Neymar hian an ram Brazil chu 2016 Summer Olympics-ah a champion pui a, Barcelona-a Lionel Messi leh Luis Suarez nen an inkawp lai phei chuan MSN hminglem pek niin khawvela trio ṭha bera chhaltu an tam khawp ang.

Neymar awm loh hnua Barcelona tlak hniam dan en hian Brazilian forward ṭhat zia a hriat theih a, chutihrualin a ropuina belhchhah tur chuan Champions League nomawi a chawi a ṭul. Angel Di Maria hming lam rik a ṭul, UCL-a Real Madrid champion puitu kha a ni a, Argentine winger hian a phu ang tawk fakna a dawng ṭhin lo. Hming langsar apiang awt Los Blancos-in Di Maria aia FIFA World Cup golden boot dawngtu James Rodriguez an thlang kha, an ti sual tih a lang chho zel.

PSG hian tlarhnungah pawh keeper Keylor Navas, defender tawnhriat nei ṭha Thiago Silva, Marquinhos, Juan Bernat, Thomas Meunier leh Layvin Kurzawa te an kawl a, an ngaihtuah awm loh. English football tui Mizote hriatthiam dan turin Manchester United chhuanvawr ṭhin Ander Herrera-a'n PSG-ah khelhna hmun a chang meuh lo a, hei hian French champion dinhmun a sawifiah awm e.

Inelna kalphung an tlak a, knockout a nih chiah takah chuan Atletico Madrid dinhmun a ṭha sawtah a ngaih theih. Spanish club hi Diego Simeone team enkawl a nih avangin defensive game an khel thiam dawn tih chu a chiang a, chutihrualin player ṭha an kawl tel tih hriat a ṭha bawk.

Atletico keeper Jan Oblak hi khawvel keeper ṭha ber anga chhaltu an tam ta hle. Tlarhnunga Renan Lodi, Felipe, Stefan Savic leh Kieran Trippier te intlar hi an rintlak viau a, tlarhnung pui turin midfield-ah Saul Niguez, Koke leh Thomas Partey te an awm. Ghanian midfielder Partey hi nipui transfer-a club lian it rawn a ni mek.

Tlarhma lamah Diego Costa an kawl a, kum 31 mi Costa hian season thara Champions League an khelh theih nan Real Betis lamah goal a khung. Goal nawr tur hian Alvaro Morata, Angel Correa, Thomas Lemar leh rawlthar manto Joao Felix te an kawl. Atletico-in quarterfinal lut tura first leg leh second leg-a Liverpool an hneh ve ve kha thil mak a ni lo - an ṭha ve hrim hrim a ni.

Pep Guardiola hian 2010-11 season khan a vawi thum nan Barcelona chu Champions League-ah nomawi a chawi pui a, hemi hnu hian Europe-ah nomawi a la chawi leh ta lo. Spanish manager hian Bayern Munich enkawlin semifinal ṭum thum thleng mah se Spanish club pathum Barcelona, Real Madrid leh Atletico Madrid te a hneh lo.

Manchester City a enkawl hnuah English club-in hma sawn mah se Champions League-ah erawh beisei an pha ṭhin lo. Season khatnaah 'away goal rule' hmangin Last 16-ah Monaco an hneh lo, season hnihnaah Liverpool chu quarterfinal an hneh lo a, season thumnaah quarterfinal-ah bawk Tottenham Hotspur chu 'away goal rule' hmangin an vanduai.

Tun season-ah away goal rule a awm dawn tawh lo a, amaherawhchu Man City hi Premier League-ah an che ṭha tawk lo. Pep Guardiola hote hian an la chawi ngai loh Champions League-ah an champion dawn a nih chuan tlarhnung an siam ṭhat a ṭul ang.