Oriflame MFA Cup 2023; Khawzawl Vengthar hmaah Melbuk

Mizoram Football Assocaition (MFA) hnuaia inelna - Oriflame MFA Super Cup 2023 chu vawiin hian a hmawr bawk a ni dawn. Chawhnu dar 1:00-ah inelna kharna inkhawm ṭan a ni ang a, chawhnu dar 2:00-ah inelna thlengtu Khawzawl Vengthar GSA leh Melbuk team TMFC ten nomawi an inchuh ang.

Team pahnih hi league round-ah an intawng tawh a, goal lut loin an inhnehtawk. Final-ah chuan inhnehtawk a awm thei dawn tawh lo, chuvangin inkhel a hmuhnawm ngei ngei ang - Vanglaini thu dawn dan chuan, inkhel enna hmun ṭha chang tur chuan kal hma a ngai dawn.

Khawzawl an inpeih

Inelna hi Mualvawmah khelh a ni - Khawzawl District Football Association Ground hi vawiina final khel tur Vengthar GSA awmna hmun nen chuan a inhlat deuh, mahse khaw pakhat an nih avangin player-ten an naupan lai aṭanga an hriatchian hmun a ni.

Semifinal-ah khan Khawzawl hian hrem vangin an captain Lalṭhakima leh midfielder Lalfakzuala te an chhawr thei lo, final-ah erawh coach PC Lalchhanchhuaha'n (Lalnaua) a duh a nih chuan a chhawr thei tawh dawn.

Coach Lalnaua chuan, "Kan khuaa inkhel kan ni a, kan champion theihna tur a nih phawt chuan thi leh thau pawlhin kan khel ang. Min ṭantu an tam dawn, kan khingpui tur hi an thlenna veng ṭhenkhat chuan an lo ṭan ve a ni mai thei, midang zawng chuan min ṭan vek ang," tiin Vanglaini a hrilh.

Mizoram team pawh kaihruai tawh Lalnaua hian player tawnhriat nei ṭha pathum - winger PC Hmangaihzuala, Royal Wahingdoh academy chhuak defender Rohlupuia leh Kerala Blasters tana khel tawh Lalruattluanga te a nei, tlarhnung lam chu an ngaihtuahawm loh.

Goal thum khung tawh pahnih striker V. Lalhriatrenga leh winger Benjamin Lalruattluanga te an nei bawk a, anni pahnih chawm tur hian Hyderabad FC tana khel tawh midfielder F. Malsawmtluanga an nei bawk, champion turin an squad a chhah ṭha tawk.

Melbuk inringtawk

Mizoram chhak lam kila khaw pakhat Melbuk hian football an tuichilh a, sorkar puihna tel loa khelmual lai thei an nih avangin an khuain football an âtchilh dan tur chu a hriatthiam theih - MFA Cup final en tur pawhin a hmuna kal tum an tam.

Mizo coach ṭha Lalsangzuala Hmar kaihhruaiin Melbuk hi Champhai district champion an ni thei. Tunah Melbuk club TMFC hi MFA Cup champion ni turin match khat chauh chak an ngai tawh, hmabak hlenchhuah ngei an tum dawn.

Sanga chuan, "Kan intawn hmasak khan goal a lut lo, an tlarhnung an inven thiam em avangin a harsa. Tunah chuan goal khung dan kawng dang kan dap a ngai dawn a, kan hriat fuh ngei pawh ka beisei," tiin Vanglaini a hrilh.

Melbuk hian Mizoram pawn lam thlenga tawnhriat nei, captain Zonunmawia an kawl a, goal thum khung tawh winger Lalramchuana an nei bawk, ani hi semifinal-a goal hnih khung thei a nih avangin Khawzawl tan ven uluk a ngai ang.

Defender rinrawl Lalchhuan-mawia erawh hliam vangin a inlan thei dawn lo, coach Sanga chuan Mawimawia hmun ruak an hnawh khah a ngai dawn tih a sawi a, goal nawr na ve tak Khawzawl team lakah fimkhur a ngai dawn.