MCL champion Chanmarians

Cricket Association of Mizoram (CAM) hnuaia inlena lian Mapuia Memorial Mizoram Cricket League (MCL)-ah Chanmarians an champion. Nimin final hmuhnawm takah Chanmarians hian Ramhlun Venglai chu wicket ngain an hneh.

Suaka Cricket Ground, Sihhmuia inkhelah ṭhum vawra vannei zawk Ramhlun Venglai lamin vawm hmasak an thlang. Over 20 chhungin RVL hian run 116 an siam a, run 70 siamtu Ahmaa Ralte a langsar a, ani lo chu mimal run siam hnem fal an awm lo.

Khaw awm dan a zirin cricket kalhmang a danglam ṭhin, ni dangah chuan run 110 bawr chauh pawh chakpui tham a nih chang a awm a, match ṭhenkhatah erawh run 150 pawh a him loh chang a awm ve bawk.

Ni sa lutuk lo mah se khua a lum a, boruak a hnawng hran lo. League round leh qualifier an khelh dan chhut chuan Ramhlun Venglai tan an run siam hi hum theih tur tawk chu a ni ve tho, an ball vawm thiamte an chet ṭhat a ngai thung.

Chanmarians lamin match dang ang bawkin mimal langsar fal an nei lo. B. Lalnunfela (36 runs), Lalhruaizela (24), Lalbiakfela (24) leh Lalhriatrenga (10) ten run pangngai tak an siam thei a, over 19.3-ah an target an khum.

Vanglaini zawhna chhangin Chanmarians treasurer Lalchhandama chuan, "Tun tourna-ment hi mimal anga chawimawina kan dawn tam ṭum a ni lo, mahse team thawhhona ṭha vanga kan champion thei hi a lawmawm hle.

"Player ṭhenkhat an chet fuh loh niah midang an rawn che ṭha ve leh ṭhin a, inelna kan hmachhawn tirh aṭanga a tawp thleng khan chutiang chuan kan kal. Kan tan chuan tournament hriatreng tlak a ni," tiin a sawi.

League round lamah Chanmarians hian hnehna an chang fai vek a, a chung berah an awm. Final-ah anmahni el phak leh tualchhung team ṭha Ramhlun Venglai an hneh leh thei a, a vawi thum nana MCL champion nih an phu - season hmasa khan pahnihna an lo ni tawh bawk.

Final-ah chak lo zawk ni mah se Ramhlun Venglai tan season duhawm tak a ni tho. Mahuma Memorial leh CAM Cup-ah an champion tawh a, heng an hlawhtlinna hi an chherchhuah player hmanga an hlawhchhuah a ni ṭhin.

RVL manager Vanlalzuata chuan, "Kan player ṭha paliin National Cricket Academy min zawm san a, ni danga kan squad aiin kan pan deuh, chutichung chuan ka nauten an khel ṭha hle. Champion Chanmarians ka lawmpui," tiin Vanglaini a hrilh.