PVL khelh hun tur a chiang

Mizoram chhunga volleyball inelna lian leh ngaihhlut ber Mizoram Pro Volleyball League (PVL) chu June 2 aṭangin khelh a ni dawn a, kumin hi season ruk an khelhna tur chiah a ni ang.

Mizoram Volleyball Association leh LPS Vision chuan PVL atan hian inremna an siam fel. Inelna hi R. Dengṭhuama Indoor Stadium, Mualpuiah khelh tur niin mipa team paruk leh hmeichhe team pasarih an tel ang - ruahman dan chuan June 30-ah zawh tur a ni.

Nikum khan mipa team panga an tel a, May 27-ah final khelin Durtlang North-in Thutak Nunpuitu Team an hneh a, a vawi khat nan an champion. Hmeichhe lamah Bethlehem Vengthlang chuan Bungkawn hnehin nomawi an chawi ve bawk.

Tun season 2022-23 kal mekah Durtlang North, TNT, Hunthar, Chhinga Veng Spikers leh Tuichangral an tel kim leh vek dawn a, kai thar Tuipuiral nen mipa team parukin trophy an inchuh dawn a, Pro Volleyball chanchina Aizawl pawn team pakhat aia tam an tel hmasak ber a ni nghal ang.

Hmeichhe season kal mekah Bethlehem Vengthlang, Bungkawn, Durtlang leh Kanan bakah kai thar pathum Power Dept. Sporting Club, Armed Veng South leh Luangmual nen team pasarih an inel dawn a ni.

Kum 2022-23 season chhungin Pro Division team tan MVA-in tournament vawi hnih a buatsaih tawh. Season hawnna leh MVA Cup-ah Hunthar mipa team an champion ve ve a, hmeichhe lamah Kanan an champion ve ve bawk.