Man United tan UCL a chiang lo?

Manchester United-in season thara Champions League khelh an duh chuan tun kartawp inkhel a pawimawh dawn. Erik Ten Hag-a hote hian Ningani zan khan club talbuai Tottenham Hotspur lakah an goal neih an hum thei lo a, 2-2 in an inhnehtawk.

Pathianni zan dar 6:30 hian Old Trafford-ah tun hnaia che ṭha Aston Villa an mikhual dawn a, Unai Emery hote hi UCL khel tura an elpui an nih bawk avangin an inkhel tur hi a pawimawh hle.

Bul ṭan ṭhat a tawk lo

Man United-in Tottenham an tlawh a, Spurs hi an match hnuhnung berah Newcastle United-in 6-1 zetin an sawp. London club hian manager lailawk Cristian Stellini banin manager lailawk atan Ryan Mason an hmang.

Khelmual pawn lama buai Spurs hi khelmual chhungah pawh an buai a, minute sarihna lekah Jadon Sancho chuan ṭha zetin Man United tan hmahruaina goal a khung.

Man United an che ṭha zui a, Sancho goal hnihna ni thei tur erawh goalline aṭangin Ivan Perisic-a'n a tauh chhuak. Bruno Fernandes-a'n hla tak aṭangin keeper hna a siam a, Spurs keeper Fraser Froster hian Marcus Rashford goal khung tur a dang bawk.

Minute 44-naah Fernandes-a ball vawrh luh chu Rashford-a'n ṭha taka a lakluh hnuah ṭha zetin a pet goal. First half-ah 2-0 a ni.

Halftime-ah Spurs an infuih ṭha a, nung takin inkhel an ṭan. An chance ṭha neih hmasak khung lo mah se Pedro Porro-a'n minute 56-naah fing takin goal kilah a khung a, Spurs tan beiseina a siam.

Fernandes-a'n goal khung belh leh theihna a nei a, a harsa zawng zawng a thawh zawh hnuah crossbar a pet per. United-in hun ṭha an hmang ṭangkai lo a, Spurs-in beiseina an neih miau avangin na takin an nawrlet.

Minute 80-naah Kane-Son combination hmuhin a awm a, England captain pass ṭha zet chu Son Heung-min-a'n chiang takin a pet goal. 2-2 in inkhel a tawp a, Man United-in point hnih an hloh.

Boruak a sang

Manchester City leh Arsenal ten UCL an khel chiang tawh a, hmun ruak pahnih la awm hi pasarihna Liverpool thlengin an la beisei vek.

Pathianni zana Man United hmachhawn tur Villa hi paruknaah an awm a, an inthlauhna hi point ruk chauh a ni. Unai Emery hote hi tun hnaiah an che ṭha ringawt lo a, Man United hi Emery hnuaia an match hmasa berah 3-1 in an hneh.

Chutihrualin, FA Cup-ah Man United hian 4-2 in an hneh let a, vawi khat ve ve an chak tawh. Ten Hag-a kaihhruai United hi mahni muala khel tur ni mah se chet ṭhat ṭum leh chet chhiat ṭum inkar a hlat avangin chak tura rinkai zawk tia sawi an rem lo. Man United hian an elpui Villa hi an hneh lo a nih chuan season thara UCL khelh pha lo thei an ni.