Liverpool khelmualah Spurs an leng dawn

Tun season Premier League-a beisei phak lo team thlang dawn ta ila, Liverpool leh Tottenham Hotspur hming lam rik hmasak a ni ngei ang. Mahse, thil mak ve angreng tak chu, team pahnih hi an intawn dawnah an khel ṭha ve ve.

Pathianni zan dar 9:00-ah team pahnih hi an intawng dawn - season thara Champions League khelh beiseina a la bo bik loh avangin club pahnih hian chak tumin thapui an thawh dawn a, hei hi hmuh châkawm chu a ni.

Tottenham Hotspur hian Ningani zan khan Manchester United an mikhual a, 2-0 a an hnufual reng hnua si phurh sut zoin team huaisen zia an chhuah a, coach lailawk Ryan Mason hoa an inrintawk lai takin Anfield an lenglut dawn.

Champions League khelh tum Spurs leh Reds hi point khat chauhin an inthlau mek a, point khata sang Tottenham hian match khatin an khel tam thung - Pathianni zan inkhawm banah inkhel hmuhnawm en tur a awm dawn e.

Thinrim vang!

Spurs hi Newcastle United laka 6-1 a tlawmin an mualpho a, coach lailawk Cristian Stellini ban zuiin, Ryan Mason-a'n mawhphurhna a la - United lakah an mualpho leh dawn emaw tih hnuah Pedro Porro leh Son Heung-min hmanga si phurh sut zoin, point khat hlu tak an hlawh chhuak.

South Korean forward Son chuan, "Khati maia game a tawp kha kan phal lo. Chawlhlawka 2-0 a hnufual kha kan nihna a ni lo a, kan thin a rim takzet. Magpies laka kan khelh dan kha pawm zam theih a nih loh avangin thlen nawntir kan duh lo a, hrehawm kan tih em avangin vawiinah chuan thatho taka khelh kan duh a ni," a ti a, United lakah huaisen taka an beih let thu a sawi.

Spurs boss Mason pawhin, "Magpies laka kan tlawm dan kha a tlawmngaihthlak em avangin a hrehawm hle. Tuna pawimawh ber chu season tawp thlenga thawhhona ṭha a ni. Thil hotea kan ngaih pawhin result a thlak danglam thei a, ka tan chuan inlungrual taka khelh ho zel hi a pawimawh ber zel ang. Team tana theihtawp chhuah ho hi football-ah chuan a pawimawh a, a pawimawh ber hial ang," a ti a, thawhhona chu an hmachhuan tur a nih thu a sawi.

London club hian tlarhmaah Son, Harry Kane leh Richarlison tlarin, bench aṭanga Dejan Kulusevski an luhtir theih avangin Mason sawi anga an thawhhona a ṭhat phawt chuan Liverpool hneh turin an ṭha tawk tih a lang a, match thum hrem Lucas Moura a inlan thei leh tawh dawn bawk - hetihlai hian Yves Bissouma (ke rêk), Rodrigo Bentancur (khup), Ryan Sessegnon (malpui) leh Emerson Royal (khup) te chu hliam vangin an la chawl mek.

Mahse...

Hringnunah hian, "Mahse..." tih a ngai leh ṭhin. Spurs-in United lakah inlungrualna an lantir a, mahse, Pathianni zana an tawn tur Liverpool hi season chhe tak hmang mah ni se, an khelh ṭhat tluan lai tak a ni ve leh hlauh!

Liverpool hian league match thum chu a zawnin hnehna an chang tawh a, goal 11 zet an khung. Spurs tan an intawn hun tur hi, "A hun lo," tia sawi theih a ni a, chutihrual chuan Reds hian heng match thumah hian goal an chhuah vek.

Kane leh Son neitu Spurs tan goal khung theih a ni tih a chiang a, Liverpool tlarhnung tan inven fimkhur a ngai dawn tihna a ni tel bawk. Chutihrual chuan Reds hian Mohamed Salah, Cody Gakpo, Diogo Jota, Darwin Nunez leh Luis Diaz an nei ve tho a, Roberto Firmino erawh hliam vangin a la chawl.

Spurs hian tun season Premier League-ah goal 53 zet an chhuah tawh a, PL club zingah anni aia chhuah hnem team panga chiah an awm - an chet chhiat season pawha league goal 61 khung thei Liverpool-in goal khung ngei an tum dawn a, Spurs first choice keeper inhliam Hugo Lloris dinhmun he thu buatsaih lai hian a la chiang lo.

Klopp a fimkhur

Liverpool boss Jurgen Klopp chuan Spurs an mikhual tur thlirlawkin, "United lakah khan an tih fo ṭhin dan angin an khel a, an rilru a inpeih tih a hmuh theih a, a khawi zawk zawk pawh kha chak thei dinhmunah an ding. 1-0 a nih laite khan chance duhawm an nei a, kha kha football chu a ni.

"Nizanah khan min hmachhawn tur player an awm nual a, khatiang game kha hmachhawn turin kan inbuatsaih ang," a ti a, Spurs lakah result ṭha nei tur chuan a awlsam loh tur thu a sawi - Hammers laka hliam tenau nei Jota a dam tawh a, London Stadium-a inlan thei lo Ibrahima Konaté a dam tawh bawk.

Klopp chuan sawi zawmin, "Match thum a zawna chak hi chak kaltluang a ni thei lo. Result ṭha chu a ni ngei a, mahse, a bul ṭanna chauh a la ni. Nghet taka kal zel tur chuan kan khelh ṭhat a, result duhawm neih zel a ngai a, chumi tur chuan theihtawp kan chhuah reng. Ka beisei thil tam tak ka hmuh avangin tun dinhmunah chuan ka lawm a, hei hi coach tan chuan a duhawm a ni," a ti.

German coach chuan, "Hmasawnna tur chu a awm zel a, tih zel pawh kan tum ang. Kan tun dinhmunah ka lawm a, mahse, engkim a fel ta tihna erawh a ni lo - rilru zawng zawng kan pek chhunzawm a ṭul. Tun season hian ka zir châk miah loh zirlai min chhawpsak a, mahse, football-a zirlai paiwmawh ber erawh point thum hlawhchhuah a ni," a ti a, Spurs lakah hnehna chan a tum.