Silly Point: IPL LAMTLUANG

Bul kan ṭan chauh emaw kan tih chhungin , Tata Indian Premier League 2023 chanve chu kan lo thleng leh ta der mai.

Champion hmasa ber Rajasthan Royals te saipui kal lai ang maia an kal laiin, thlalera Polar Bear hmuh a harsat ang bawkin Delhi Capitals leh Sunrisers Hyderbad ten chak ni tawn an harsat thung. Champion lai Gujarat leh Chennai Super Kings te hi mit la pawl tak an la ni hrih bawk.

Mi hlui an hrang

Test cricket chawlhsan tawh South African star Faf Du Plessis-a dang zo reng an awm lo a, Royal Challengers Bangalore lama a ṭhianpa Virat Kohli nen kumin bikah chuan ball vuak lamah an vawk lal len hrih hle.

Ball vawm lamah India innghahna ni chho mek Md Siraj leh Afghan keite Rashid Khan a te batter-te mangchhia petuah an ṭang hrih thung.

Hun ṭha leh lawmawm

Ni tin inhlawh chawp chunga a pain a thupui ber cricket khel tura a chawm, Rinku Singh chuan he hun ṭha hi kut khing hniha lo banin, IPL history-a a zawna six vawi nga vuain a team a chakpui zui bawk. An pu, Bollywood Lalpa tih hiala an sawi Shah Rukh Khan a mit a tlung ngei mai.

Tamil rawlthar Sai Sudharsan leh Rajasthani patuai Ravi Bishnoi te hi hun engmaw chhung chu India cricket titi pakhat luahtu an ni dawn tih a chiang bawk. Tendulkar a hmel khelmual chhungah kan hmu leh thei a, tun ṭum erawh Sachin Tendulkar ni loin a fapa ball vuak aia a vawm lam thiam zawk Tendulkar junior a ni.

Technical

Technical Substitution hi khandaih hriam tawn ang vel a ni a. Kum 15 liam ta khan hun rei lotê chhung chu ICC pawn Super Substitution dan a lo hmang tawh ṭhin a, hman fuh chuan team chakna hnar ni si, mahse team zawng zawngten an hmang ṭangkai em em vek kher loh a ni, tih erawh a chiang.

A chang phei chuan, team tichaktu aiin, game plan tibuaichuartu a nihna chin pawh a awm awm e. Kumin IPL Khelmual curator ten, pitch ṭha thei ang ber an siam tlangpui a, T20-ah run 200 chuang siam hi thilmak a ni tawh lo tih a chiang a, chutihrual chuan kumin IPL hi, over hnuhnung ber leh last minute a inkhel inthlak danglam bawih bawih tam ṭum ber a la ni hial awm e.

Engpawhnise, he league stage chanveah hian, a tawpa dingchang tur team palite hriathiam a la har hrih hle a, IPL team intluk tlan ber ṭum a ni, kan la ti thei hrih awm e.