Tluk hlen tum lo Valencia an chak

Spanish club langsar, relegate thei dinhmuna ding reng Valencia chu relegation zone aṭangin an tal chhuak ve leh ta a, fan-te hlim takin an nui ve leh ta - Ningani zan khan Real Valladolid chu 2-1 in an hneh.

Valencia khelmuala inkhelah mikhual team tan Canadian striker Cyle Larin chuan goal hmahruai a khung a, tun season-a talbuai tak Valencia fan-te an mangang.

Mahse, Los Che (Valencia sawina) tan Mouctar Diakhaby leh Javi Guerra ten goal khat ve ve khungin an chhanglet a, Valencia-in 2-1 in hnehna an chang.

Valencia-in hnehna an chan avangin table-ah 16-na dinhmun an luah a, mahse, 18-na Getafe aia an sanna hi point hnih chiah a la nih avangin Valencia tan him tawh lena len erawh a la thiang rih lo.

Comeback ropui

Mestalla Stadium-ah Valencia chak lai hmuh chakin fans tam tak an pungkhawm a, mahse, an hmuh hmasak zawk erawh an lama goal a lut lai a ni - minute rukna lekah Cyle Larin chuan Valladolid tan goal hmahruai a khung.

Canada international hian Valencia defender Mouctar Diakhaby fimkhur tawk loh rah sengin goal hmahruai hi a khung a, Mestalla chu a reh duk - goal dang lut loin chawlh lawk hman a ni.

Minute 60-na a ni a, Valencia-in tlawm an tum lo tih an pholang. Diakhaby chuan a tihsual thup mawi nan si phurh sutna goal a khung a, minute 90 thleng goal dang a luh loh avangin team pahnihin point an insem dawn niin a lang hman.

Mahse, hun pek belh minute thumnaah Guerra a inlar a, kum 19 mi midfielder hian La Liga match thum a khelhnaah Valencia tan hna ṭha tak a thawk a, chakna goal a khung - Valencia-in point thum hlu tak an hlawh chhuak.

Ka chhungte tan

Spain Under-19 international Guerra-a'n a team tan goal hlu bik a khung a, a hlim hle. Guerra chuan, "Ka chhungte leh team pumpui ka ngaihtuahnaah an lo lut nghal a, he hnehna chan hi kan phu a ni," a ti.

Guerra hi Valencia-a piang leh seilian a ni a, a naupan laiin Villarreal Youth team tan khel mah se, kum 2019 khan Valencia U18 a zawm a, tunah chuan senior team tan goal hial a khung ta.

Spanish midfielder chuan, "Valencia mi ka ni a, hetianga Mestalla hmuh hi ka tan chuan a hlimawmawm hle - kan chakna hi team tan a ni," a ti a, he rawlthar hi chhinchhiah bik a sual lo ang.

Valencia hi relegation zone-a an awm lai khan football ngainatu tam takin second division lama tla thla mai tur chuan an phal lo a, tunah chuan Los Che hian an league match hnuhnung pahnihah hnehna changin, beiseina thar an nei ve leh ta. Mahse, vawi khat chetsualin engkim a la thlak danglam thei tih hriat a ṭha.

Inkhel dang

Ningani zan inkhel dangah Villarreal chuan 4-2 in Espanyol an hneh a, Yellow Submarine tan season thara Champions League khel tura beiseina a sang sawt laiin Espanyol erawh tla thei dinhmunah an ding mek - table-ah 19-na an ni.

Espanyol hian Javi Puado hmangin goal hmahruai khung mah se Villarreal-in Etienne Capoue leh Dani Parejo hmangin an chhanglet a, 2-1 a ni. Mahse, Catalan club hian Joselu hmangin si phurh an sut ve leh a, team pahnih an intiat tawk hle.

A tawpah erawh mualneitu Villarreal an chungnung ta nge nge - Nicolas Jackson leh Capoue te chuan goal khat ve ve an khung ve leh a, 4-2 a hnehna changin table-ah pangana an ni mek.

Hetihlai hian tlak hlauhthawnawma ding hman Sevilla chuan 1-0 in Athletic Bilbao an hneh a, Lucas Ocampos chuan hun pek belhah penalty aṭanga goal awmchhun khungin, table-ah 11-na an ni ta.

Barca & Real

Nizan khan Osasuna leh Real Sociedad ten league match khelh chhunzawmin, an result kan hre hman lo - zaninah hmahruaitu Barcelona leh an elpui Real Madrid an inlan zui dawn a, Pathianni zan dar 12:30-ah Atletico Madrid chuan Valladolid an lenchilh dawn bawk.

Barcelona hian zanin dar 12:30-ah Champions League khelh tum Real Betis an mikhual dawn a, Catalan club hian La Liga-ah point 11 ngawtin hma la hruai fal mah se an league match hnuhnung paliah vawi khat chiah an chak avangin insiamṭhat an mamawh hle.

Real chuan zanin dar 10:00-ah Almeria an mikhual dawn a, hnehna an chan chuan an chunga awm Barca hi pressure an pe thei dawn - hei vang hian Carlo Ancelotti naute tan chak a pawimawh.

Mahse, Real hi an league match hnuhnung bera 4-2 a Girona ngam lo kha an ni a, Spanish top flight league-a ihamtan tum Almeria hian Santiago Bernabeu-ah chak an tum ngam ang.