Record ka um lem lo - Verstappen

Tunlai Formula 1 driver ṭha ber Max Verstappen chuan mimal record a um lem lo tih a sawi a, a sang thei ang ber thlen erawh a tum, a tum a tihlawhtling thei ta lo a nih pawhin a thlen chinah a lawm tih a sawi bawk.

Red Bull driver hi tun hnaiah a zawnin vawi hnih a champion, tun season kal laiah pawh driver championship hmahruaitu a ni mek. A chesual viau a nih ngawt loh chuan champion tura rinkai ber pawh a ni ang.

Dutch tlangval Max Verstappen chuan, "Nomawi pasarih emaw pariat emaw hi ka ngaihtuah ber a ni hran lo. Nomawi tam tak hlawhchhuah theihna tur car kan nei a nih erawh chuan tihhlawhtlin theih pawh a châkawm takzet.

"A chang hi chuan thui leh sang tak thleng thei tur anga inngaih chang a awm, kan hma hun erawh kan sawi theih a ni lo. Tunah hian Red Bull tan kum 2028 thleng daih contract ka nei, chumi hnuah chuan thil dang ka ngaihtuah chauh ang," a ti.

Kuminah hian intlansiak 23 a awm dawn, tun thlatira tlan zawh tak Australian Grand Prix-ah khan Verstappen hi a chak. Pathianni tlai dar 4:30 hian Azerbaijan GP an tlan leh dawn a, inelna hmuhnawm an chhawp chhuak leh ngei ang.