Premier League hmun ruak pakhat a la awm

Championship hmawr bawk a hnai a, season thara Premier League khel tur pahnih chiang tawh mah se hmun ruak pakhat a la awm - hei hi playoff hmanga chinfel tur a ni a, playoff hmun ruak inchuh boruak a sang hle.

Vincent Kompany enkawl Burnley chuan champion nomawi chawi tawhin, season thara English top flight league an khelh tur tichiang hmasa ber an ni a, Nilaini zan khan Sheffield United chuan 2-0 a West Bromwich Albion hnehin, season thara Premier League khel turin an inpetkai ve leh bawk.

Sheffield tan hian Sander Berge leh Anel Ahmedhodzic chuan goal khat ve ve an khung a, West Brom-in a chhanletna tur an nei lo. Sheffield tan league match 43 an khelh tawha vawi 26 an chakna chiah a ni a, pathumna Luton Town aia an sanna chu point sarih niin, Luton hian match hnih chiah khelh tur an neih tawh avangin Sheffield hi an um pha thei tawh lo a ni.

Blades (Sheffield sawina) hian 2020–21 season kha Premier League khelin, season tawpah an relegate - English top flight league hruai kaitu Chris Wilder chuan March 13-ah chhuahsanin, tuna an coach Paul Heckingbottom hian season tawp thleng a enkawl lailawk.

Season hmasa kha Championship-ah coach Slavisa Jokanovic hoin bul an ṭan ṭha a, beisei ang result an neih loh avangin November-ah an ban. Heckingbottom lam bawk an hawi - Paul hian mak takin pangana a nihpui a, playoff hial a thlenpui. Mahse, Nottingham Forest ngam loin Championship-ah bawk an su nawn a, tunah chuan kum 45 mi Heckingbottom hoin Premier League an inpetkai ta.

Hetihlai hian playoff khelh tum inum boruak erawh a la sang hle - league-a pakhatna leh pahnihna chu Premier League khel tura tling nghal an ni a, hmun ruak dang pakhat hi pathumna aṭanga paruknaten playoff hmangin an chingfel ṭhin.

Pathumna Luton Town leh Middlesbrough chu playoff khel tur chiang tawh an ni a, mahse, pangana Coventry City leh parukna Sunderland erawh an la him lo - table-a pasarihna Milwall aṭanga 12-na Swansea City thlengin playoff khelh an la beisei vek!