League One-ah Premier League club hlui Wigan

Premier League meuh khela kum 2013-a FA Cup nomawi lo chawi tawhtu Wigan Athletic chuan season tharah League One an khel dawn a, an khelhna tur hi English Football League-a third division inelna a ni. 

Wigan hian Championship-a inhamtang turin khelmualah chuan hna pangngai tak an thawk - mahse, khelmual pawn lamah harsatna an tawk a, July 1 khan Latics (Wigan sawina) hi administration-ah dah an ni. 

Championship club hi administration-ah dah an nih avangin an point hmuh sa aṭangin 12 paihsak an ni a, point heti zat paih a nih takah chuan table-a 13-na kha 23-naah an tla a, League One lamah an relegate zui. 

Wigan hian 'force majeure' dan tlawhchhanin hrem an nihna chu an khinglet a, mahse an hlawhtling lo - season tharah League One an khel ang a, fan-ten Premier League-a kir leh an lo beisei ṭhin chu mumang mai a chang ta rih. 

Mihring dan theih loh, khuarel chhiatna avanga club-in harsatna a tawhin 'force majeure' huang chhungah dah theih a ni. Chumi awmzia chu khuarel chhiatna, indo emaw hri leng (Covid-19 ang hi)-in a tihbuai avanga club chu administration-a dah a nih chuan hriatthiam theih an ni. 

Wigan hian hei tlawhchhanin administration-a an awm chhan chu an duh reng vang a nih loh thu an sawi a, mahse pawmsak an ni lo. English Football League chuan thuchhuah siamin, "Thubuai ngaihtuahtute thutlukna chu a kaltlang dawn a, engkim hi dan ang thlapa tih a ni. 

"EFL chuan administrator-te chu theihtawp chhuahin a thlawp dawn a, club hma hun atana ṭha ber tur ngaihtuah reng chungin hma a lakpui zel dawn a ni," an ti a, Wigan fans tan thu hriat nuam a ni chuang lo. Wigan hi June thla khan Hong Kong-a hmunpui nei, company Next Leader Fund chuan an lei a, mahse thla khat hnu lekah Hong Kong sumdawng hausa Au Yeung Wai Kay hnuaia Next Leader Fund hian club hi administration-a awm turin an kalsan. 

Wigan-in season thara League One an khelh a ngai ta mai tur hi fans tam tak tan chuan a na khawp ang. Latics hian season tawp lamah khan Championship-a inhamtang turin an match hnuhnung 15-ah vawi riat hnehna an chang a, vawi ruk an khingpui inhnehtawkpuiin vawi khat chiah an tlawm. 

Mahse, administration-ah an awm tak avangin harsa taka an hlawhchhuah sa point 12 chu paihsak an ni a, 23-na an ni ta daih - an aiah hian tla anga inngai tawh Barnsley chu Championship-ah an cham chhunzawm dawn ta thung a, Wigan vanduaina chu Barnsley tan vanneihna a chang. 

Wigan hian kum 2018 khan League One nomawi chawiin Championship-ah an kir a, mahse kum hnih chauh hun an hmang hman tihin third division lamah an tla leh ta a ni - season ruk chhunga Championship aṭanga an vawi thum relegate-na a ni. 

Chu mai a ni lo - Wigan hi season riat chhunga vawi li an relegate-na a ni bawk a, heng zingah hian kum 2013-a season riat hnua Premier League aṭanga an relegate kha a tel. Wigan an tho hleithei lo. 

Wigan hi footballer hlui leh sumdawng hausa Dave Whelan hnuaiah kum 2018 thleng kha chu an awm a, ani hnuaiah hian English football-a fourth division aṭangin Premier League thleng an inhlangkai. 

Mahse JJB Sports company neitu hian November 2018 khan Hong Kong-a hmunpui nei International Entertainment Corporation hnenah Wigan a hralh a, IEC hian Next Leader Fund hnenah May thla khan an hralh chhawng ve leh - June 4 khan tihchian a ni. 

Mahse, July 1-a lo her chhuak a, club neitu thar chuan Covid-19 vanga sum harsatna chhuanlamin Wigan an hnuchhawn a, administration-a awm turin an kalsan - Latics-in hrem nan point 12 an hloh dawn tih a lang a, beiseina erawh a la awm. 

July 7-ah Wigan-in point 12 paihsak an nih tur chu khinlet an tum tih tihchian a ni a, July 14-ah khan Hull City chu 8-0 in an sawp zui - point 12-in relegation zone an tlansan a, hrem an nihna an khin dawn bawk avangin fans-in beiseina an nei. 

Wigan tan point 12 paihsak pawh ni se, chumiin a tihbuai loh tura him dan ngaihtuah a ngai - mah se July 18 khan Charlton Athletic chu hun tawp dawna goal lut vangin 2-2 in an inhnehtawkpui a, an dinhmun a chhe sawt. 

July 22 a her chhuak a, Championship-a an match tawp berah Latics hian Fulham chu 1-1 in an inhnehtawkpui - Wigan tan a pawi zo ta. Team ṭha Fulham inhnehtawkpui mah se point 12 paihsak an nih chuan an him zo dawn lo tih an hria a, an vanduai takzet. 

August 1 a her chhuak a, coach Paul Cook chuan a banna a thehlut zui. Kum 53 mi coach chuan, "Hrehawm ti tak chungin he thutlukna hi ka siam a ni," a ti a, kum 2017-a lakluh coach hian Wigan a kalsan. 

Cook ban lai hian Wigan hian beiseina an la nei a, mahse an beiseina zawng zawng chu August 4-ah a thamral - point 12 paihsak an nih chu kaltlangpui a ni a, season thar aṭangin League One-ah Wigan an inlan ang.