Administration: Eng nge a awmzia?

English football-ah club an tlakchhiatin, "Administration-ah an awm, " tia sawi a ni fo ṭhin a, a awmzia hre lo tam tak kan awm mai thei. Club hi suma an talbuai emaw, neitu nei loa an awmin 'administration'-ah dah an ni ṭhin a, club a tawp mai loh nan hei hi hmanruaah hman a ni. 

Club ṭhenkhat chuan huaisen takin 'risk' an la a, inkhel entu zat aṭanga sum hmuh tur leh thil danga an sum hmuh tur aṭanga chhutin player lei leh hlawh pek nan sum tam tak an seng ṭhin - an beisei anga an chet ṭhat loh emaw, an relegate chuan hei hian club sum dinhmunah nghawng a nei leh a, administration-a awm a ṭul phah ṭhin. 

Administration-a club dah an nih hian a enkawltu tur accountant thiam bik rual ruat an ni a, hemi te hian kar riat chhung chu club enkawl hna hi thawkin club lei duhtu tur company an zawnsak a, inbiakna engkim an kalpui ṭhin. 

Chu mai a ni lo, administrator-te hian club-in rang taka sum a hmuh theihna tur an ngaihtuah tel a, chumi tur chuan club-in bungrua a neih, football tana ṭangkai lo hotel emaw ram te chu hralhsak a tum a, player-te chu market-a an hlutna pangngai aia hniamin an hralhsak ṭhin bawk - club sum sen tihhniam dan ngaihtuah tel a ni a, hei hian coaching staff leh player hlawh tihhniam thlengin a huam. 

Administrator-ten club chhanchhuah dan tur an ngaihtuah a, chung zingah chuan an zawn hmasak ber chu club neitu thar a ni - administrator-ten uluk takin club lei tum dinhmun an lo zirchiang ang a, club tana ṭha ber tur ngaihtuahsak chungin an hralh ang. 

Company Voluntary Agreement (CVA) tih dan chu a awm leh a, hemi dan hnuaiah hian club leh an sum hmansak/batsak te chu an inrem a ngai a, club chuan hun tiam chhungin a sum hman te chu instalment-a a rulh a ngai dawn - CVA hmang tur chuan sum puk tirtu 75% talin rem an tih a ngai thung. 

Administrator-ten club leitu tur an hmu zo lo a, CVA hmang tura inremna an nei thei lo a nih chuan club hi tihtawp tur a ni - club bungrua zawng zawng hralh vek a ni ang a, club ṭantu intelkhawm pawlin club thar dinin non-league aṭangin bul an ṭan leh ang. Hetihrual hian fans organisation hian sum an hmuh chuan club bungrua an chhawm thei dawn a ni. 

Hriat tel tur chu talchhuahna kawng an zawnnaah club hralh tur leh CVA hmang tur hian Football Creditors Rule an tih chu an zawm a ngai leh a, hemi danah chuan club chuan league an khelh chhunzawm leh hmain club-a player leh staff zawng zawng te chu an hlawh an pek tlak vek a ngai a ni.