Bundesliga-ah entu awm theih beisei

German rama football inelna sang Bundesliga leh Bundesliga 2-ah te chuan a hmuna entu an awm leh theih tawh an beisei a, club lam beiseina hi a hlawhtlin theih nan sorkar thuneituten an phalsak an la ngai.

Covid-19 vangin season hmasa Bundesliga kha hun rei tak chhung an chawl lailawk, inkharkhip hnuah European League lian zinga a hmasa ber turin an khelh chhunzawm - tunah chuan a hmuna entu awm theih dan an ngaihtuah ṭan leh der tawh.

German Football League CEO Christian Seifert chuan, "League leh club chuan a hmuna entu awm chung ngeia inkhelh hi kan duh dan a ni. Entu awm tih pawh hian stadium khat tlata kal khawm nghal chu kan ngaihtuah bik lo.

"Stadium len dana zirin entu awm thei zat hi fel takin a ruahman theih a, inkaihhruaina dan ṭha tak kan siam a nih chuan mipui lam pawhin thuawih takin an zawm leh mai ang, season tharah chuan entu an awm theih ngei kan beisei," a ti.

German sorkar chuan October 31 hma chuan an rama mipui punkhawmna lian huaihawt a phal lo. Sorkar ruahmanna hmasa hi tih danglam a nih loh chuan season thar tir lamah chuan stadium chhungah fans an awm thei lo chhunzawm dawn tihna a ni, siam danglam theih erawh a la ni.