Oriflame MFA Cup; Melbuk club TMFC an thiam ber
Mizoram Football Association (MFA) hnuaia district hrang hrangte inelna Oriflame MFA Cup neih zawh takah Champhai district aiawhtu TMFC, Melbuk an champion.
Inrinnia final inkhel hmunnawm takah Melbuk hian Khawzawl Vengthar GSA chu 1-0 in an hneh, goal awmchhun hi Lalchhuanmawia'n chawlhlawk hma chiaha a khung a ni.
Nikum khan MFA Cup-ah Champhai district aiawhtu FC Vengthlang North an lo champion tawh bawk - tun hnaia Mizoram chhak lama awm khuaten MFA Cup an thunun tiin a sawi ngam.
Goal khat a tawk
Final khelh hmain Melbuk coach Lalsangzuala Hmar chuan a defender pawimawh Lalchhuanmawia chu hliam vangin a khel thei dawn lo tih a sawi a, nomawi inchuhna inkhelah erawh Mawimawia hi a bul ṭantu zingah a tel.
Defender palian Mawimawia hian freekick aṭanga ball kal chu chawlhlawk hma chiahin a khung a, champion nan a tawk. TMFC lamin ball chang tam loin inkhel thunun zawk lo mah se, an goal an venhim theih avangin an champion.
Coach Sanga chuan, "Lalchhuanmawia hian inkhel tura a inpeih thu min hrilh a, ka player berin a khelh ngam chuan ka tan khelhtir mai a ngai, minute 10 lek pawh khel se a pawi lo tiin bul ka ṭantir a ni," tiin Vanglaini a hrilh.
Lawmthu
An champion hnuah Melbuk hian Inrinni zan khan an khua an pan nghal, final en tur hian motor 24 vel zet an thawhchhuah bawk avangin an boruak a nung hle - Champhai district chauh ni loin Mizoram huap champion an nih avangin a mak lo.
TMFC coach Sanga chuan, "Beisei phak bakin mipui lamin min hlutsak a, ka tan chuan a hlu takzet a ni. Melbuk khaw mipui chungah ka lawm. Chu bakah kan thlenna Zaingen YMA ten kan mamawh zawng zawng min tihsak a, an chungah kan lawm takzet," a ti.
Melbuk hi Champhai district first division champion an ni a, an district chhung khaw hrang hrang inelnaah an champion bawk. An khuain football an tuichilh a, sulhnu lian dang neih belh tumin hma an lak chhunzawm a rinawm.
Pahnihna Khawzawl
An khuaah an inkhel a, khelmual sirah ṭantu an ngah - ball chang hnem leh inkhel thunun tak chung siin goal erawh an khung thei lo. Khawzawl Vengthar GSA tan pahnihnaa lungawi a ngai ta a ni.
Vengthar GSA coach PC Lalchhanchhuaha (Lalnaua) chuan, "Goal khung theih tlat loh chuan a tih ngaihna a awm lo, kan vanduai ṭum a ni. Min ṭantu Khawzawl mipui leh kan district chhung mi zawng zawng chungah lawmthu ka sawi takzet.
"Inelna buatsaihtu MFA hian fak an phu bawk, anni vanga inkhel thei kan ni. Chubakah chuan Khawzawl pa ka ni a, inelna hmachhawn tura district hrang hrang aṭanga team lo kalte hnenah lawmthu ka sawi," a ti.