Europe inelna beisei Brighton-in goal ruk an khung

Brighton & Hove Albion-in game mawi an khel a, goal an khung tel bawk. Seagulls hian Inrinni zan khan Wolverhampton Wanderers chu 6-0 in an sawp. Roberto De Zerbi hote hian match 31 aṭangin point 52 an hmu a, an duh ber Champions League an khel pha lo a nih pawhin Europa League khel turin kawng a la inhawng zau hle.

Amex Stadium-ah Brighton tan Deniz Undav, Pascal Gross leh Danny Welbeck ten goal khat ṭheuh an khung a, Ningani zanah FA Cup semifinal-a an hneh loh Manchester United an mikhual dawn. De Zerbi leh Erik Ten Hag-a te inhmachhawn tur hi nomawi inchuhna tur chu ni lo mah se UCL inkhel tur inchuhna a nih avangin boruak a sang khawp ang.

Goal ruk

Brighton-in na takin an nawr a, minute rukna lekah Joël Veltman ball pet chu Danny Welbeck-a'n lo kheng zeuhin Deniz Undav-a'n chiang zetin a ti goal. Minute 13-naah goal dang a lut lehnghal a, Julio Enciso-a'n ṭha taka a lakluh hnuah a ball pek ṭha chu Pascal Gross-a'n mawi zetin a khung.

Minute 13 hnuah Enciso pek tho chu Gross bawkin box pawn aṭangin mawi zetin a volley goal a, minute 26-naah 3-0 a ni tawh. First half-ah goal khat dang a luh belh leh a, minute 39-naah Pervis Estupinan a cross chu Welbeck-a'n a tauh lut.

Second half-ah pawh Brighton bawkin bul an ṭan ṭha a, Man United forward hlui Welbeck-a'n box pawn chiah aṭangin minute 48-naah a khung lehnghal. Brighton-in pressure an pe ṭha a, Wolves-in chet ngaihna an hre lo. Minute 66-naah Seagulls hian pressure pek ṭhat zarah box bulah ball an chhuhsak a, Deniz Undav-a'n cool zetin keeper José Sá a pet khum. 6-0 in inkhel a tawp.

Engtin zel?

Brighton boss Roberto de Zerbi chuan, "Tha hrui ngah ka duh avangin player panga ka thlak a, result-ah ni loin ka player-te khelh danah ka lawm hle. Match hnuhnung pahniha kan result vangin hrehawm ka ti a, tun ṭumah chhanletna kan hmu. Ka naute hi rinhlelh lai ka nei ngai lo," tiin a sawi.

Seagulls hian Wolves an sawp hma hian Nottingham Forest lakah 3-1 in an tlawm a, FA Cup semifinal-ah Man United an hneh lo bawk. De Zerbi chuan, "Coach ka nih hnua kan khelh ṭan ber ṭum a ni a, mak erawh ka ti hran lo. Ka naute hian theihna sang tak an nei a ni. Tunah chuan Manchester United hmachhawn turin kan inbuatsaih a ṭul a, kan thil tum hlen hi kan phuin ka hria a, kan tum chu season thara Europe inelnaa inlan a ni," tiin an hmachhawp a sawi lang.

De Zerbi hian Kaoru Mitoma, Alexis Mac Allister leh Moises Caicedo te bench-a a dah chungin 6-0 in an chak thei a, Man United an hmachhawn hunah pawh point thum hlawhchhuah ngei an tum ang.