French Cup champion Toulouse

Toulouse chuan a vawi khat nan nomawi hlu tham an chawi ve ta. Inrinni zana khelh zawh tak French cup final-ah Nantes chu 5-1 in an sawp a, an club tan chuan theihnghilh ngai tawh loh tur mellung pawimawh a ni.

Philippe Montanier-a naute hian Logan Costa-a goal hnih hmang lekin minute 10-naah 2-0 in hma an hruai nghal a, Thijs Dallinga chuan goal hnih bawk khung belhin chawlhlawk hmain 4-0 zetin an sang fel der tawh.

Second half-ah Nantes tan Ludovic Blas chuan penalty aṭangin goal khat khung ve mah se, a hnu lawkah Zakaria Aboukhlal chuan hla tak aṭangin chak nemnghehna leh an goal ngana ni bawk a khung.

French Cup bikah hian 1970 khan Saint-Etienne chuan Nantes 5-0 in an lo hneh tawh a, hemi hnuah chuan tun ṭum hi inhnehna a nasat ber ṭum a ni hial - tuna champion ta Toulouse hi 1970 khan an din ve chauh a ni!

Tun hma deuh, kum 1957 khan Toulouse FC tih hmingpu chuan French Cup hi an lo la tawh, mahse Paris club Red Star nen an inzawm chhunzawm ta daih, club hran pangngai Toulouse tia an kal hnuah tun ṭum hi an champion vawi khatna a ni.

Season hmasa mai kha chuan Toulouse hi Ligue 2 club an la ni. French football inelna sang ber Ligue 1 khel tura tlingin kuminah an inlan ve chauh a, tunah chuan coach Philippe Montanier hoin French Cup an la der.

Player a nih laiin Montanier hi Toulouse tana khel tawh a ni. Kum 2021 June thla khan player a nih laia a club hlui enkawl tur hian a kir, hun rei lotê chhunga club hma a sawn pui dan hi a nep lo hle a ni.