Crystal Palace an him?

Crystal Palace chuan Inrinni zan khan West Ham United an mikhual a, goal sarih luhna inkhelah Eagles hi 4-3 in an chak. Roy Hodgson-a hote hian point thum hlu tak an hlawhchhuah avangin point 40 an hmu a, Premier League khel zel turin an him tawha ngaih a ni.

Selhurst Park Stadium-ah goal a sur a, first half-ah ringawt goal nga a lut. Hammers tan minute kuana lekah Tomas Soucek-a'n pet goal nghal mah se Palace-in Jordan Ayew, Wilfried Zaha leh Jeffrey Schlupp te hmangin an lehthal.

Chutihrualin first half-ah vek Michail Antonio-a'n Hammers tan siphurh a sut ṭhen a, half time-ah Palace-in 3-2 in hma an hruai. Second half-ah Eberechi Eze-a'n Nayef Aguerd laka a penalty hlawhchhuah chu goal-ah a chantir a, Eagles-in 4-2 in hma an hruai.

Minute 72-naah Nayef Aguerd hian a tihsual siamṭhat nan corner aṭanga ball kal tauh lut mah se goal dang hmuh tur a awm lo a, 4-3 in inkhel a tawp. Palace-in Premier League an khel zel dawn a, Hammers erawh an dinhmun a la him lo.