Fan-te kan mamawh lai a ni - Maddison

Leicester City attacking midfielder James Maddison chuan an talbuai lai tak chu fan-te an mamawh zual lai a nih thu a sawi a, hun harsaah pawh anmahni thlawp tlat turin Foxes ṭantute a ngen.

Kum 26 mi Maddison chuan, "Fan-te hlimna leh lawmna tur hi tun season-ah kan pe tam lo hle a, hei vanga an lo phur tawk lo a nih pawhin ka hrethiam hle - a bik takin inkhelh laia a hnufual zawk kan nih lai phei chuan a harsa zual ang.

"Mahse, ka sawi fo ṭhin angin, hun harsa leh hrehawm kan tawh lai pawha min ṭan tlat hi kan tan a pawimawh em em a ni. Kan chak loh lai leh, table hnuai lama kan talbuai lai hi fan-te kan mamawh lai ber a ni. Wolves nena kan inkhelh ṭum pawh khan a tawp thlengin fan-ten theihtawp chhuahin player-te an pui a, in lam aṭangin lo en mah ila, a hmuna awm ve ang mai ka ni," a ti.

Leicester City hian April 22 zan khan an mikhual Wolverhampton Wanderers lakah 1-0 in hnufual hman mah se, 2-1 in an comeback a, he inkhelah hian damlohna avangin Maddison hi a inlan thei lo. Hemi hnu hian league match khat khel leh tawhin, Leeds United lakah goal an chhuah hmasa leh a, mahse, minute 80-naa Jamie Vardy goal hmanga si phurh sutin, 1-1 in an inhnehtawk.

Foxes hi tun season-ah an talbuai hle. Premier League table-ah 18-na ni mekin, relegation zone-ah an awm a, zanin dar 12:30-ah hian an hnuai chiaha awm Everton an mikhual dawn - zanin inkhela chak zawk hian relegation zone an chhuahsan dawn a, team pahnih tan 'final' tih hiala chhal ngam a ni.