Milan leh Roma inhnehtawk

Inrinni zan Serie A inkhelah AC Milan leh AS Roma te chu 1-1 in an inhnehtawk, season thara Champions League khel turin point thum mamawh dun viau mah se point khatah an lungawi a ngai.

Team pahnih an inhnektawk a, minute 90 chhungin goal a lut lo. Mualneitu Roma lamin injury time minute linaah striker Tammy Abraham hmangin goal an khung, a luh hun ngaihtuahin chakpui mai theih tur a ni.

Mahse, mikhual Milan lamin minute sarihnaah Alexis Saelemaekers hmangin an sut a, goal dang luhna hun a awm tawh lo, khelh zat inangah team pahnih hian point 57 ve ve an hmu, goal difference nei ṭha zawk Milan hi palinaah an awm - season thara UCL khel phak chin chiah.

Stefano Pioli enkawl Milan hian Serie A nomawi an hloh dawn, nizan inkhel result a zirin Napoli chu Italian champion an ni fel hman tawh mai thei. League champion ni lo mah se Milan hian palina chin tal nih an tum, inelna lian Champions League semifinal khelh hmabak an la nei bawk.

Jose Mourinho enkawl Roma pawhin Europa League semifinal an lut ve tawh tho a, an tan chuan Serie A chauh ngaihtuah theih a ni bik lo. Season hmasa khan Roma hian an European title hmasa ber turin Europa Conference League nomawi an lo chawi tawh bawk a ni.