Goal li khungtu Barcelona leh Real Madrid

La Liga an match hnuhnung bera an tlawm ve ve hnuah Barcelona leh Real Madrid an insiamṭha leh nghal a, Spanish football-a club lian pahnih hian Inrinni zan khan league-ah an khingpui ve ve an hneh.

Real Madrid hian Santiago Bernabeu-ah Almeria mikhualin, 4-2 in an hneh a, Karim Benzema chuan hattrick siamin Rodrygo chuan goal khat a thawh bawk - Almeria tana Lazaro Vinicius leh Lucas Robertone te goal khungin awmzia a nei phak lo.

Carlo Ancelotti naute chak thu hre sain Barcelona an inlan a, an tlawm chuan Real nen an inkar a zim sawt dawn tih an hai lo. Mahse, Catalan club hian pressure nei miah lo ang maiin an khel a, 4-0 in Real Betis an hneh.

Catalan club tan Andreas Christensen, Robert Lewandowski, Raphinha leh Guido Rodríguez (own goal) ten goal khat ṭheuh an khung a, an mikhual lakah Barca-in ṭhat an chhuah lo - league table chung berah point 11-in an sang fal zel a, champion turin league match ruk khelh tur la awmah vawi thum chak chiah an mamawh tawh.

Benzema - a la tar lo

Kum 35 mi ni tawh mah se Karim Benzema a la tar lo tih kan hmuh chhunzawm zel a, hattrick a siam - French striker hian tun season-a match 37 a khelh aṭangin goal 29 ngawt a khung ta a, La Liga-a goal 236 a khungna chiah niin, Spanish top flight league-a goal khung tam lamah Lionel Messi (474), Cristiano Ronaldo (311) leh Zarra (252) chiah a tluk lo.

Benzema hian minute nganaah goal hmahruai khungin, minute 17-naah a belhchhah a, minute 42-naah Lucas Vazquez penalty hlawhchhuah hmangin hattrick a siam. Almeria hian first half hun pek belhah Lazaro Vinicius hmangin si phurh an sut ṭhen a, 3-1 a ni.

Mahse, second half ṭan aṭanga minute hnihna lekah Real bawk inlarin, Rodrygo chuan an goal lina a khung a, chak tur a chiang tiin a sawi theih. Mahse, Almeria hian chuti maia inkhel boruak thi tur chu ngai ngam loin, Robertone hmangin an khung ve leh a, 4-2 a ni.

Relegate hlau Almeria hian goal li chhuah mah se hahdamin Real an chaktir bik lo a, hetihrual hian Eduardo Camavinga leh Rodrygo khung chu offside vangin pawm a ni lo bawk. Real hian Thawhlehni zanah Real Sociedad lenchilhin league match an khel leh ang a, Copa del Rey final (vs Osasuna) leh Champions League semifinal first leg (vs Manchester City) an khel zui leh ang.

Goal li khungtu Barca

Real chak thu hre sain Barcelona an inlan a, harsatna nei loin Champions League khelh tum Real Betis an lo hneh - Catalan club tan defender Christensen chuan minute 14-na lekah Raphinha siamsak chu goal hmahruai atan a khung a, Barca jersey ha chunga a goal khung hmasak ber a ni.

Betis buaina belhchhahin a awm zui - minute 12-na leka hliam vanga lakchhuah Luiz Felip aia lut substitute Edgar Gonzalez chuan minute 33-naah a yellow card pahnihna a hmu a, hnawhchhuah a ni.

Catalan club-in minute thum hnu lawkah tam zawk nih an chhawr nghal a, Robert Lewandowski chuan minute 36-naah an goal hnihna a khung. Minute thum a liam leh a, Raphinha chuan a belhchhah leh a, chak tur a chiang tawh.

Barca-in goal khungpuitu mamawh lo mah se, minute 81-naah Guido Rodríguez chuan Ansu Fati ball cross chu an lamah a tilut a, Catalan club-in 4-0 a hnehna changin, champion an tum tih an pholang.

Record siamtu Yamal

Barcelona-in Betis an hneh zanah chanchin lawmawm dang an nei tel a, kum 15 mi Lamine Yamal chuan minute 84-naah Gavi thlakin, Catalan club tana inlan thei naupang ber record thar a siam.

Kum 15 leh ni 290 mi Yamal hi La Liga-a inlan thei naupang pangana a ni a, Spanish top flight league-a inlan thei naupang ber record chelhtu hi Real Mallorca player ṭhin, Serie A club Lazio tana khel ta Luka Romero a ni.

Romero hian kum 2020 khan Real Madrid lakah Mallorca tana khelin, khatihlai khan kum 15 leh ni 219 chauh a ni. Betis laka inlan Yamal hi ball thiam bik player a ni a, winger ni mah se attacking midfielder leh centre forward-ah a chhawr theih bawk.

Barca boss Xavi Hernandez chuan Yamal hi, "Hlauhthawnna nei lo," tiin a lo fak tawh a, Atletico Madrid nen an inkhelh khan squad-ah a lo dah tawh. Hetihlai hian Betis winger Joaquin chu kum 41 mi ni chungin Barca lakah a la inlan a, Yamal a pian khan La Liga match 215 a lo khel tawh!