Man United leitu tur: Sheikh Jassim nge Sir Ratcliffe?

Joel leh Avram Glazer te chuan Raine Group kaltlangin Manchester United an zuar a, Zirtawpni khan dilna thehluh hun a tawp.

Dilna thehlut zinga hming langsar pahnih Sheikh Jassim leh Sir Jim Ratcliffe te chu Zirtawpni zan dar 10:00 (BST) thleng an ngamna zat thehluh nawn lehna hun pek an ni a, India ram sanaah chuan zan dar 2:30 thleng an hawnsak ṭhin a ni.

Khawthlang lam media zinga an indawr dan hrechiangtuin a tarlan danin Sir Jim Ratcliffe company 'Ineos Group' chuan Qatar banker Sheikh Jassim aiin an ngamna a sang zawk tih a tarlang. Man United leitu tur erawh tihchian a ni lo.

Sheikh Jassim ngamna

Sheikh Jassim chuan Nine Two Foundation kaltlangin dilna hi a siam a, club manah hian pound tluklengdinawn nga (£5bn) chuang a thehchhuah phal bakah club thuneihna hi 100%-a neih a tum.

A hlawhtling a nih chuan infiamna khawvela club leina sang ber record a ni dawn. Nikum August thla khan Walton-Penner chhungkua chuan NFL club Denver Broncos chu £3.7bn-in an lei a, he record hi a khum dawn.

Qatari mi hausa hian club lei bakah hian hmachhawp ṭha tak an siam a, Man United infrastructure chu siamṭhat an tiam. Hei bakah hian an ba rulh zawhsak a tel bawk. December 2022 thleng khan Man United-in pound maktaduai 741 ba an nei a ni.

Qatar Islamic Bank chairman Sheikh Jassim hi Qatar prime minister hlui fapa niin Man United ṭantu ruhkawla sawi a ni.

Engtin zel?

Sir Jim Ratcliffe erawhin a elpuite angin Man United thuneitu nihna hi 100% a lei a tum lo. Kar liam ta kha chuan 69% lei a tum niin sawi a awm a, chutihrualin hei ai pawh hian a la tlem thei. Engpawh chu nise Ratcliffe lei zat tur hi 51% ai chuan a tlem dawn lo.

Club thuneihna pumpui a lei dawn loh avangin Sir Ratcliffe-a'n Man United lei a ngamna zat hi Sheikh Jassim leh a hote ngamna zat aiin a tam zawk. Chutihrualin a ngamna zat tak erawh tarlan a ni lo thung.

Tunah chuan club thuneitu Glazer chhungkuain hmalak zel dan tur an tichiang ang. Hriat tel atana ṭha erawh Man United ṭantuten Glazer chhungkua hi an hua a, club-ah inhnamhnawih lo se an duh. Hei vang hian nizana Aston Villa nen an inkhelh ṭumah pawh '1958' fan group ho chu 'Full Sale Only' tih thupui nen Glazer an duh lohna tarlang tura ngaih an ni.