Tsitsipas lakah Thiem a chak lo

Set khatna a hloh a, dinhmun ṭha lo zawka a din hnuah Stefanos Tsitsipas tho chhuakin Dominic Thiem chu 3-6, 6-1, 7-6(5) in a hneh a, harsa angreng takin Madrid Open round of 32 a inhlangkai.

Player pahnih hi clay court-a inkhel thiam ve ve an ni. Thiem hi hliam vanga rei tak a chawlh hnua lo kir, mahse ngaiawh leh hleithei ta lo a ni a, set khatna a lak avangin beisei a nei sang hman hle.

Mahse, tunlai player hmunnawm berte zinga mi Tsitsipas hian a service ṭha a hmang ṭangkai. A service hmasa 80% teh meuh a ti dik a, na taka a ball vuak a kal dik avangin Thiem tan lo dawnsawn a harsa.

Greek tlangval Tsitsipas chuan, "Tharum hman a ngai nasa ngei mai, inkhel hautak leh awlsam lo tak a ni. Keimah chauh ni loin Thiem pawh khan tharum a hmang nasa hle," a ti.

Season hmasa khan Tsitsipas hian Madrid Open semifinal a lut, tun ṭumah hian a match lehpek atan chuan Argentine tlangval Sebastian Baez nen an inkhel ang - chak zawk tura rinkai zawk a ni leh ang.

Seeded pakhatna Carlos Alcaraz tan pawh thil a awlsam nghal vek bik lo. Spanish rawlthar hian a match hmasa berah Emil Ruusuvuori chu 2-6, 6-4, 6-2 in a hneh a, nizan khan Grigor Dimitrov nen an inkhel zui leh nghal.

Inkhel dangah Daniil Medvedev chuan Andrea Vavassori chu 6-4, 6-3 in a hneh. Russian star Medvedev hian season duhawm tak a hmang mek a, kum danga inkhelh a harsatna hmun clay clourt-ah pawh season dang nena khaikhin chuan result a nei ṭha rih hle.

French Open inbuat-saihna tournament zinga pakhat Madrid Open-ah hian, world number 1 Novak Djokovic leh clay court lalpa tia an sawi ṭhin Rafael Nadal te chu hliam vangin an inlan thei lo a ni.