Hun ṭha bawhpelhtu Dortmund

Borussia Dortmund-in Bundesliga champion theihna hun ṭha an nei a, Edin Terzic-a hote hi ṭum dang ang thoin a sa sehah an duap. Dortmund hian table hnuai lama awm Bochum lakah point khat chauh an hlawh chhuak a, season dang ang thoin champion turin Bayern Munich chetsual an nghah a ṭul leh dawn.

Vonovia Ruhrstadion-ah Dortmund an lenglut a, Bochum-in an barakhaih nghal. Minute ngana lekah Anthony Losilla chuan box pawn aṭangin goal kilah mawi zetin a pet lut. Team ṭha zawk Dortmund an insiamrem vat a, Karim Adeyemi hmangin minute hnih hnuah siphurh an sut nghal.

Dortmund khel a nung chhunzawm a, Jude Bellingham-a'n a thiamna lantir mah se goal a keng tel lo. Adeyemi pawhin a hun ṭha neih vawi hnihna a hmang ṭangkai lo bawk. Mikhual team-in goal khung ngei tumin second half-ah Youssoufa Moukoko an luhtir a, kum 18 mi Germany international Moukoko pawhin a chance neih chu goal zawnah a pet lo.

Bellingham pawhin chance ṭha dang a nei a, goal zawnah pet mah se Bochum keeper Manuel Riemann a paltlang thei lo. Team pahnih hi 1-1 in an inhnehtawk a, Dortmund-in point hnih an hloh.

Dortmund hian Wolfsburg, Borussia Monchengladbach, Augbsurg leh Mainz te an la hmachhawn dawn a, an chak vek a nih pawhin Bayern-in point an hloh a ngai dawn. Thomas Tuchel-a hote hian nizan khan Hertha Berlin an hmachhawn a; Werder Bremen, Schalke, RB Leizpig leh FC Cologne te an la hmachhawn dawn. Bundesliga nomawi inchuh boruak a 'hot' hle.