Mavericks tan Doncic a thiam tawk

Luka Doncic-a triple double hmangin Dallas Mavericks chuan Sacramento Kings 114-110 in an hneh a, Western Conference-ah pasarihna dinhmun hauhin playoff khel turin an dinhmun an siam rem zel.

Nimin zing HP Field House-a inkhelah Donic hian point 34 a neih bakah, assist vawi 12 leh rebound vawi 20 a la bawk. Ani bakah hian point 22 neitu Tim Hardaway Jr chuan a thawh hlawk a, inkharkhip hnua match thum an khelh tawhah a vawi khat nan hnehna an chang.

Slovenia tlangval Doncic hian season kal laiah vawi 16 ngawt triple double a nei ta a, record a nei ṭha ber. Rebound vawi 20 a lak pawh a mimal record ṭha ber a ni. Nikum December thla khan New Orleans lakah rebound vawi 18 a lak tawh chu a rawn khum chiah.

Inkhel dangah team ṭha Milwaukee Bucks chu Brooklyn Nets lakah 119-116 in an chak lo, team pahnih inkhel tawk viau mah se hun pawimawh lai takah Timothe Luwawu-Cabarrot chuan point 26 a neih zinga 3-pointers pakhat lutin a team a chak pui.

Bucks thiampuipa Giannis Antetokounmpo-a'n point 16 a nei, coach Mike Budenholzer chuan Antetokounmpo leh Khris Middleton te chu inkhel chawhnu lamah a hahchawlhtir, playoff khel tura an tlin chian tawh avangin player ṭha a khek.