Premier League hmahruaitu chu Man City: Zaninah Arsenal leh Chelsea innuai dawn

Arsenal champion tumna a thamral mek a, beisei bo vek erawh a la ni lo. Mikel Arteta chuan nimin tlai khan chanchinbu mite a khawm a, match khelh hmabak panga an la neih avangin Premier League champion an la ni thei tih a sawi.

Gunners hian zanin dar 12:30 hian Emirates Stadium-ah Chelsea an lo mikhual dawn, an chak a nih chuan table hmahruaitu an ni lailawk leh ang, mahse, Manchester City aiin match hnihin an khel tam ve leh thung ang.

Chelsea hian beisei tur an nei tawh lo tia sawi theih a ni a, an talbuai chhunzawm reng a nih phei chuan tlak mai pawh a hlauhawm thei hial dawn. Frank Lampard-a'n a hmangaih Blues hliam hi tuamdam ngei a duh, a tihdan erawh a hriat a ngai.

Beiseina

Tun hnaiah Arsenal an chesual nasa, a zawna match thum chhung an khingpuite nen an inhnehtawk hnuah Man City lakah an tlawm a, an dinhmun hnuh hniamsak an ni nghal, tho chhuak leh tur chuan Pep Guardiola naute chetsual an ngaihchan a ngai tawh.

Gunners manager Arteta chuan, "Thil harsa leh tih theih loh tura ngaih ṭhenkhat kha kan ti thei, chuvangin Premier League nomawi pawh beisei bo a la ni bik lo. Kan hun kal tawha kan chetsualna kha chu theihnghilh ila, tunah chuan London Derby ngaihtuah ang.

"A ṭha berte nena inelphak kan ni tih hriat a ngai a, chumi rilru pawh chu kan pu tur a ni," a ti. Spanish manager hian a defender pawimawh William Saliba chu hnungzâng na vangin an la chhawr thei rih dawn lo tih a sawi lang bawk.

Saliba awm loh karah Rob Holding chu tlarhnung laiah a ding ṭhin. Saliba tel loin tun hnaiah Arsenal hian match ruk an khel a, goal an chhuah vek - vawi hnih chiah an chak. Arteta-a'n a hnung lam a rem phui lo a nih chuan Chelsea lakah pawh chesual thei an ni.

Inrintawk a ngai

Thomas Tuchel an ban a, an buaina a fel lo. Graham Potter an ban a, an buaina a fel chuang lo. Frank Lampard hian a pal hnawk zual emawni tih mai tur a ni a, tun dinhmuna Chelsea player-ten inrintawkna an nei lo hi a mak hran lo.

Blues manager Lampard chuan, "Inrintawkna kan nei lo a, kan khel ṭha thei lo bawk. Tuna kan mamawh ber nia lang chu inrintawkna neih let leh a ni, hetiang hun harsa hi chu player ka nih lai khan ka tawng tawh," a ti. A tawnhriat hmangin a naute tihharh a tum ang.

Nipui leh thlasik bazarah Chelsea hian sum an hmang hnem, team khat daih aia tam an lei khawm hial. Mahse, an result a ṭha thei rih si lo. Lampard chuan, "Mikel Arteta-a'n bul a ṭan dan kha chhut kir ta ila, tlarhnunga a player rem dan pawh a danglam nasa.

"Tunah chuan an ṭhat dan an hre tawh a, khelh dan nghet an nei tawh. Team enkawltu lam hian zawhna kan dawng hnem, chumi chhanna ṭha tak chu Arsenal chanchin hi a ni," tiin an khingpui tur Gunners pawhin team ṭha din turin hun an mamawh tih a sawi.