Man City chakna Haaland leh Alvarez

Pep Guardiola-a'n Premier League nomawi chu an kuta awm a nih thu a sawi tawh a, a thusawi tidik tur hian Pathianni zan khan Fulham chu 2-1 a hnehin a chung berah awmhmun an khuar, match khata khel tlem chungin point khatin an sang!

EPL bakah Champions League leh FA Cup khelh tur an la neih avangin Pep-a tan player siksawi thiam a ngai. Nawmsam loh vang tiin Kevin de Bruyne chu hahchawlhtir a ni a, tun hnaia khel ṭha Bernardo Silva pawh bench lamah dah a ni.

An ṭhat dan berin khel lo mah se Man City hian minute thumna lekah Erling Haaland-a penalty hmangin goal hmahruai an khung. Man City striker hian tun season inelna hrang hrangah goal 50 a khung tling der - EPL season khata goal khung hnem Andy Cole (34 goals) leh Alan Shearer te a nihrual bawk.

Rin ang ngawtin Citizens an chak nuamsa bik lo, minute 15-naah Carlos Vinicius chuan si phurh a sut. Chawlhlawk hmain Julian Alvarez chuan box pawn aṭangin goal mawi bik a khung a, goal dang lut zui loin point thum hmuh nan an hmang.

Nomawi inchuh chu a la awlsam dawn lo tih sawiin Guardiola chuan, "Premier League hi a awlsam lo tih kan hriat nawn a ngai, a bik takin khualmualah a harsa ṭhin. Thawhlehni zanah Arsenal an inkhel dawn a, a chunga awm chu a danglam leh thei.

"Nilaini zanah keini kan inkhel chhunzawm ve leh thung ang, hun rei lote karah hian boruak a la danglam thei reng," a ti. Man City hian Nilaini zan hian Etihad Stadium-ah West Ham United an lo mikhual ang.