A hunah tak Stephen Curry a inlar

Stephen Curry tan season duhawm tak a ni hleithei lo a, a team Golden State Warriors ngei pawh NBA nomawi hloh mai thei dinhmunah an ding. Mahse, hun harsa an tawh lai tak hian Curry a rawn ding chhuak - tunah chuan Western Conference semifinal a hruai thleng ta.

Nimin zing NBA playoff game 7 inkhelah Warriors hian Sacramento Kings chu 120-100 in an luhchhuah a, best of seven series chu 4-3 in an la a, harsa takin an tlang. Hnehna an chan theih nan point guard Curry chuan point 50 teh meuh a nei a ni.

Golden State hian conference semifinal-ah chuan LeBron James-a khelhna Los Angeles Lakers an tum dawn - Nilaini zing dar 7:30-ah game 1 an khel ang, player ropui pahnih awmna inkhel hi a hmuhnawm ngei ngei dawn.

Tun season kal laiah Warriors hian an khelmual Chase Center an hmang thiam, mahse khualmuala chak an harsat. Kings lakah pawh buk rit zawk an ni lo, mahse hun pawimawh leh harsa lai takah Curry inlarin a chakpui a ni.

GSW tana player pawimawh pakhat, game 7 bika point 16 neitu Klay Thompson chuan, "Hun rei tak chhung kan khel dun tawh, tun ang em ema a khelh ṭhat hi chu a tam bik lo, boruak a san zawh poh leh nuam a ti emawni tih mai tur a ni," tiin a sawi.

Eastern Conference lamah chuan semifinal an khel ṭan, team ṭha Miami Heat chuan New York Knicks chu 108-101 a hnehin series-ah 1-0 in hma an hruai. May 3, Nilaini zing dar 5:00-ah game 2 an khel chhunzawm ve leh bawk ang.