Villa lakah Man United an ṭang tluan

Pathianni zan khan Manchester United-in match 10 chhung tlawm hmel hmu tawh lo Aston Villa an mikhual a, Bruno Fernandes-a goal hmangin 1-0 in hnehna an chang.

Inkhel pumpui thlirin Erik ten Hag-a hoten point thum hlawhchhuah an phu a, chutihrualin inkhel tawp lama thil thleng thlir tel chuan point hloh thei dinhmunah an ding. United-in point thum hlu tak an hlawhchhuah avangin season thara Champions League khel turin an dinhmun a ṭha sawt.

United an mawi

Unai Emery-a'n Aston Villa a enkawl hmasak berah Manchester United a hmachhawn a, 3-1 in hnehna an chang. Tun ṭuma an inhmachhawn hma hian Villa an khel ṭha tluang a, Old Trafford-a point hlawh chhuak thei tura ngaih an ni.

Mahse, Man United-in mifield laiah talent nei ṭha pathum Casemiro, Marcel Sabitzer leh Christian Eriksen te an dah. Tlarhmaah Marcus Rashford mal tlatin Bruno Fernandes leh Jadon Sancho ten mual sir aṭangin an thlawp bawk.

Mualneituin inkhel bul an ṭan ṭha a, Rashford-a'n a chance ṭha neih hmasak chu goal-ah pet mah se Emiliano Martinez-a'n a dansak. Villa pawhin Alex Moreno hmangin goal-ah an pet a, David de Gea-a'n a dang.

United-in inkhel an thunun a, Casemiro-a'n crossbar a pet per. Minute 39-naah Martinez-a ball petchhuah chu Casemiro-a'n tauh letin Rashford-a'n a um lut a, English forward hian a pet ṭha tawk lo niin lang mah se Martinez-a'n hmun himah a ti per thei lo. Keeper ball tih per hi Fernandes-a'n ṭha zetin a pet goal.

Casemiro vs Bruno

Second half-ah pawh Man United an che chhe lo a, amaherawhchu goal hnihna an khung theih loh an tuar. Hun tawp lamah Villa-in na takin an nawr a, Sabitzer-a'n na takin pet chhuah tum mah se Luke Shaw a per avangin hmun hlauhawm laiah ball a tla a, Douglas Luiz-a'n goal-ah ṭum hnih petin a hnuhnung zawk hi goalline aṭangin Victor Lindelof-a'n a tauh chhuak.

Hun tawp hma hretin Bruno Fernandes-a'n ball a pet chhuah mai loh avangin Villa-in an nawr leh a, freekick hlawh chhuakin Man United tlarhnung an sawi nghing leh bawk. Man United 1-0 in an chak hram a, inkhelh banah Casemiro-a'n Bruno a zilh zui.

Brazilian midfielder Casemiro hian Bruno hi League Cup final-ah Jadon Sancho ball a pek mai loh avangin inkhelh banah a titipui tawh. Crystal Palace an hmachhawn ṭumin Fernandes-a'n a tackle loh avangin Casemiro-a'n a tackle a, yellow card a hmuh avangin hrem a nih phah. Tun ṭuma an inzilh leh chhan erawh hun tawp hma hreta Bruno-a'n ball a hloh vang a ni a, Man United-in point an hloh phah teuh hle.

Chutihrualin Man United tan Fernandes a pawimawh a, Villa lakah an chakna goal khungtu a nih bakah a ṭangkai ṭhin hle. United boss Ten Hag chuan, "Ṭhenkhat chuan captain a nihna pawh an ringhlel hman. Mahse, a tum ruh a, a huaisen a, tlawm a duh lo. Champion kan duh a nih chuan hetiang player hi kan mamawh a, team angin kan ṭhat phah a ni," tiin Fernandes a fak.

Man United hian May 4, Ningani zan hian Brighton an tlawh dawn a, hnehna an chang a nih chuan a sang pathum zingah an tel thei ang.