Anfield-ah ennawm ropui - mit a tlai, thisen a heh!

Pathianni zan khan Anfield-ah goal sarih ngawt a lut a, ennawm ropui bik chhawpchhuah a ni - team talbuai, insiamthar tum mek Liverpool leh Tottenham Hotspur an intawng a, Reds hian an mikhual lakah 4-3 in hnehna an chang.

Liverpool hian minute 15 chhungin goal thum an khung hman a, Curtis Jones, Luis Diaz leh Mohamad Salah (penalty) ten goal khat ṭheuh an khung. "Liverpool chak tak ang maw?" tih ai chuan, "Engzatin nge an chak ang?" tih chu zawhna a ni.

Mahse, Spurs ṭantu ṭhenkhatin beiseina thlah a, Anfield an chhuahsan nual hnuah pawh London club an beidawng ve lo - Harry Kane, Son Heung-min leh Richarlison hmangin si phurh an sut zo a, hetihlai hian hun pek belh a ni tawh.

Liverpool haw em emtu Richarlison-a'n kawr phelh chungin a goal khung a lawm a, a team tan point a hlawh chhuakah a ngai. Mahse, Reds tan Diogo Jota chuan ngaihdan dang a nei a, minute khat hnuah an goal lina a rawn khung ve leh - a tawpah Liverpool an chak a, Champions League khelh an la beisei ve zel.

Goal a sur

Anfield-ah team talbuai Spurs an lenglut a, result beisei dan thiam a har. Mahse, ngaihdan siam thei lote chu minute thumna lekah Curtis Jones-a'n an ngaihdan a rawn thlaksak nghal a, Trent Alexander-Arnold-a ball pek tawih zet chu Liverpool hmahruaina goal ni turin a khung.

Spurs an insiamrem hman lo a, thawk an la hman meuh lo! Goal an chhuah aṭanga minute hnih hnu lawkah Luis Diaz a inlan ve leh a, Cody Gakpo siamsak chu goal-ah a chantir - hliam vanga a chawlh reng hnua goal a khung leh ta kha Reds tan hmuh a nuam ang.

Anfield-ah Liverpool an phur tawlh tawlh. Cristian Romero a chesual zui a, Gakpo lakah penalty a chawi. A pet turin Mohamed Salah a lo pen chhuak a, Bournemouth leh Arsenal laka penalty hlahtu hian chiang zetin a khung.

Spurs fans ṭhenkhatin khelmual an chhuahsan a, "Liverpool an chak dawn em?" tih chu zawhna ni loin, "Reds hian eng zat tak khung leh ang maw?" tih chu rilrua zawhna awm a ni a, Bournemouth, Manchester United leh Leeds United laka an goal khung dan ngaihtuahin a awm lo hran lo.

Beiseina neitu

Liverpool fan-ten awlsam taka chak turah an inngai a, Spurs fan-te ngaihdan a danglam lo a, khualmuala inkhel Spurs player-te ngaihdan a dang thung - Newcastle United laka 6-1 ngawta mualpho team hian, an mualphona aiin Manchester United laka 2-0 a an hnufual hnua 2-2 result an hlawhchhuah theihna an ngaihtuah tlat.

Minute 40-naah Spurs tan hun ṭha a her chhuak ta nge nge a, Ivan Perisic-a siamsak chu Kane chuan striker class bik a ni tih pholangin a volley goal a, London club-in beiseina nen chawlhlawk an hman theih phah.

Second half-ah pawh Liverpool aiin Spurs an hlauhawm hmasa zawk a, Cristian Romero leh Son Heung-min ten post an tihperte chu uiawm a tling. Mahse, London club an hnual reng bik lo a, minute 77-naah Romero siamsak ṭha zet chu goal-ah a chantir.

A la tawp mai lo - hun pek belh minute thumna a ni a, Everton tan a khelh lai aṭang tawha Reds fan-te huat rawn Richarlison chuan Son-a freekick a tauh lut a, kawr phelh chungin a goal khung a lawm. Premier League-a tun season-a goal a khung hmasak ber a ni.

A la hun lo e

Spurs-in point an hlawh chhuakah an ngai a, an mikhualna ramah inthlahrung hauh loin fan-te an sapatal - mahse, football mawina leh hmuhnawmna hmuh tirin kan awm a, minute khat chhung lekin thil a inthlak danglam lehnghal.

A hliam dam hnua form zet mai Jota hun a inher chhuak. Reds keeper ball pet thiam bik Alisson chuan na takin ball a pet chhuak a, Lucas Moura chuan Romero tan pe mah se, Portuguese forward Jota hian a lo lak khalh.

Hlauthawng hauh loa ball lalut chungin Jota hian Fraser Forster goal venah a chhuih lut a, Anfield thawm rinzia chu thua sawifiah chi a ni lo - second half ṭantira Oliver Skipp laka a foul avanga hnawhchhuah ni lo Jota vanneih a kaltluang.

Liverpool hian league match li chu a zawnin hnehna an chang ta a, match li khelh tur an la hmabak - palina Manchester United chu point sarihin an la phak lo mek a, season thara European football-a club inelna sang ber khel turin result ṭha bakah thilmak an mamawh tel tiin a sawi theih a, beiseina erawh chhit nunin a awm zel.

---------------------------------

Bul kan ṭan ṭha takzet a, duhthusam a ni. Kil tinah kan khelh dan khan min tilawm em em - kan khelh dan, goal nawr dan, kan nawr let dan, tlarhnung ven dan, goal chhuah hnua kan chhanlet dan engkim kha a ṭha e. 3-0 a hma kan hruai theite kha ropui tak chu a ni.

Hmasawn zel duhna thinlung aṭanga thlir chuan kan khelh danah khan lawmna tur leh lawm lohna tur tam tak a awm. Hei hi ka hringnun chu a ni a, tun dinhmunah chuan ka lawm em avangin kan tihsual dang kha chu kan siamṭhat theih mai ka ring - theihtawp kan chhuah zel ang.

Champions League ka beisei lo a, United leh Newcastle an chak vek te chuan, engtinnge kan khelh theih tehlul ang? An tlawm a nih chuan kan hnaih sawt dawn chauh a, keini tana European football khel tur chuan chak zel phawt mai hi a pawimawh a ni.

Brighton hian kartawpah khan football game ka hmuh tawha mawi ber pawl an khel a, Roberto De Zerbi hian fak a phu a ni. Game hniha khel tlem chungin kan hnungah an awm a, Aston Villa-in hma an sawn bawk - anni hi kan hnuaiah an awm zel thei a nih chuan kan tan hlawhtlinna a ni ang.
- Jurgen Klopp, Liverpool manager

Sawifiah thiam a harsa a, goal thum kan khungtir avangin kan tan chak kha a harsa tawh a ni. Chance pawh kan insiam hnem zawk a, ball kan chan apiang khan goal khung thei mai tur dinhmunah kan ding zel a ni. A tir aṭanga ṭha taka beih loh chuan goal chhuah hi thil awm reng a ni a, 3-0 a kan hnufual kha chuan a harsa tawh a ni.
- Ryan Mason, Tottenham manager lailawk