Min huat chhan ka hre lo - Klopp

Liverpool boss Jurgen Klopp chuan Tottenham Hotspur nen an inkhelh zawhah referee Paul Tierney a sawisel a, English match official chuan mimal takin Liverpool chu a hua nia a hriat thu a sawi.

Reds-in an chakna goal an khung khan Klopp hian fourth official hmaah an chak a lawm a, a tih el - Klopp hi a chet dan avangin yellow card pek a ni a, German coach hian referee Tierney chuan a lakah ṭawngkam mawi lo a hmang niin a sawi bawk.

Klopp chuan, "Tierney nen hian thawnthu kan lo nei tawh a, eng vanga min hua nge a nih ka hre lo. Kan lakah eng buaina mah a neih loh thu a sawi a, mahse, a dik theiin ka hre lo.

"Min en dante hi ka hrethiam lo - heng thil zawng zawng hi hriatthiam a harsa a, England-ah chuan tumahin hetiang thil hi an sawifiah kher a ṭul ngai lo.

"Goal khung ka lawm dan kha thil ṭul lo tak a ni a, chutihrual chuan yellow card min pek ruala a thusawi kha chu thil ṭul lo tak a ni," a ti a, Tierney chuan ṭawngkam mawi lo tak a hman thu a sawi.

Hetihrual hian referee intelkhawm pawl, Professional Game Match Officials Limited (PGMOL) chuan Klopp-a puhna hi an pha nghal a, an thawhpui Tierney chuan eng ṭawngkam na mah a hman loh thu an sawi a ni.

PGMOL chuan, "Premier League-a match official-te hi an thusawi engkim hriat a nih theih nan vil reng an ni a, inkhelh chunga Tierney thusawite ngaihthlakin, eng ṭawngkam mawi lo mah a hman kan hre lo a, a bik takin Liverpool manager yellow card a pek lai khan, ṭawngkam mawi lo a hman kan hre lo a ni," an ti.

Football Association chuan Klopp-a thusawi chungchang hi an zirchiang a, Klopp nge Tierney zawk an hrem dawn hriatthiam a harsa rih - Liverpool leh Tierney hi an inngaina vak lo tih chu tun hmaa thil thleng aṭangin a lo hriat tawh ṭhin.

Kum 2020 khan Reds leh Aston Villa an inkhelh ṭumin Georginio Wijnaldum laka foul awm chu Tierney hian a hmuh hmaih thu a lo sawi tawh a, Klopp hi thil thleng chu theihnghilh turin a hrilh, niin a sawi bawk.

Klopp hian kum 2021 khan, "Nang tih loh referee dang nen buaina kan nei ngai lo," tiin Tierney hi a lo ṭawng khum tawh bawk - he inkhelah hian Spurs nen 2-2 in an inhnehtawk a, Andrew Robertson hnawhchhuah a nih laia Harry Kane hnawhchhuah a ni ve lo chu a hrethiam lo.

January-a Brentford an ngam loh ṭum khan Klopp chu Tierney leh a thawhpuite lakah a lo lungawi lo tawh bawk a, tun thlatir khan Robertson leh assistant referee Constantine Hatzidakis inkara thil thlengah Tierney hian Scottish fullback hi yellow card a lo pe tawh bawk.

Hetihlai hian Diogo Jota hnawhchhuah a nih loh chungchanga Ryan Mason lawm lohna chu chhangletin, "Thil dangah a ngaihtuahna seng zawk rawh se," a ti a, a team siam ṭhat lama rilru seng turin a hrilh!

Klopp hi October-a Manchester City nen an inkhelh ṭumin assistant referee laka a chet dan avangin match khat hrem a lo ni tawh a, £30,000 (Rs. 30,72,909) chawitir a ni bawk.