Premier League khel tur Fulham

Fulham-in Championship-a season khat hun an hman hnuin an awmna tur chu Premier League a ni tih an pholang zui nghal a, season tharah English top flight football an khel leh dawn.

Nilaini zan Championship playoff final-ah Fulham hian 2-1 in Brentford an hneh a, Leeds United leh West Brom hnung zuiin Premier League khel turin an inpetkai - Championship aṭanga English top flight football-a inhlangkai a hriat kim ta.

Wembely Stadium-a inkhelah hian minute 90 chhungin goal a lut lo a, extra time khelh a ni. Fulham tan left back Joe Bryan chuan minute 100 hnu lamah goal hnih a khung a, Brentford tana Henrik Dalsgaard goal khungin awmzia a nei lo. 

Inkhel tawpna hamrik a tawp rualin Fulham boss Scott Parker a sapatal a, kum 39 mi coach hian season tluana team-a enkawl hmasak berah Premier League khel turin a tlinpui - a hnathawh ropuizia hretu ten a chet dan an dem lo ang. 

Fulham hian playoff semifinal aṭang tawhin an striker chhuanvawr Aleksandar Mitrovic chu hliam vangin an chhawr thei lo a, Parker chuan Serbian striker hi final khelhtir hram dan an ngaihtuah thu a sawi. 

Mahse, Championship-a goal 26 khungtu striker hian bench-ah bak bul a ṭan thei lo a, an striker neih hriam ber tel loin Fulham-in bul an ṭan - heti chung hian Wembley-a chance nei hlauhawm zawk chu  Fulham an ni. 

Cottagers (Fulham sawina) tan Josh Onomah chuan Brentford goalkeeper David Raya chu vawi hnih ngawt a enchhin a, mahse Raya hian goal chhuah a duh bik lo - Fulham tan Neeskens Kebano leh Bobby Decordova-Reid ten hun ṭha an khawhral bawk. 

Championship-a attacking hmuhnawm ber pawl Brentford-in pressure sang karah Fulham an nawr hleithei lo a, goalkeeper Marek Rodák-a'n hna hautak a neih awmchhun chu Ollie Watkins-a shot ṭha zeta a dan chu a ni. 

Minute 90 chhungin team pahnihin goal an khung thei lo - tlarhma nei ṭha zawk Brentford an che hleithei lo a, an striker neih hriam ber Mitrovic tel loin Fulham-in goal net an tawn puar zo bik lo. 

Mitrovic hi hun pek belhah luhtir a ni a, mahse Fulham tana goal rawn khungtu erawh Serbian striker ni loin playoff final khelh hma zawnga Fulham tana goal khat chiah khungtu left back Joe Bryan a ni. 

Kum 26 mi Bryan hian minute 105-naah freekick-in he inkhela goal hmasa ber hi a khung a, yard 40 aṭanga freekick chhuih lut tura a mit finna, a ball pet thiamna leh chet ranna chu pui tak a ni - Bees (Brentford sawina) goalkeeper David Raya a bum chiang hle. 

Minute 117-na a ni a, Bryan bawk kan hmu - Fulham-in Mitrovic an mamawhna a lang tel a, Serbian striker leh Bryan ten 'wall pass' hmanga Brentford tlarhnung an ṭhiah hnuah English defender hian striker tih awma mawiin a hmawr a bawk a, goal pawimawh a khung. 

Brentford hi a nihna takah chuan automatic promotion hmanga tling thei an ni. League round-a an match hnuhnung pahnihah point li chiah an mamawh a, mahse Stoke City leh Barnsley lakah an tlawm. 

Playoff final-ah league-a vawi hnih an hneh tawh hnu Fulham an hmachhawn a, goal hnih an chhuah hnuah Henrik Dalsgaard chuan hun pek belh minute linaah si phurh a rawn ṭhen - si phurh sut zawh nan hun a awm tawh lo a, a tawpah 2-1 in an chak lo. 

Bees tlarhmaa inkawp pathum Said Benrahma, Bryan Mbeumo leh Watkins-ten tun season-ah goal 59 zet an khung a, Championship-a tlarhma inkawp hmuhnawm ber anga chhal ngam an ni. Mahse, a pawimawh hunah an par thei lo a, Premier League khel tura an tlin zawh bawk si loh avangin Brentford tan chuan anni pathum chelh hi hna hmasa tur a ni ang. 

Kum 73 zet English top flight football khel tawh lo Brentford tan playoff final-a vawi li an tlawmna a ni a, playoff semifinal chin vawi kua an khel tawh a, an la paltlang lo vek - hei hi English Football League record a ni.