Nistelrooy-a'n PSV a champion pui

PSV Eindhoven chuan Pathianni khan Ajax nen KNVB Cup final an khel a, hun pangngaiah 1-1 niin penalty shootout-ah Ruud van Nistelrooy-a hote 3-2 in an vannei ta zawk.

De Kuip, Rotterdam-ah final hi khelh a ni a, PSV-in Everton aṭanga loan hmanga an hawh Jarrad Branthwaite chuan minute 42-naah an lamah a tilut. Second half minute 67-naah Thorgan Hazard hmangin PSV-in siphurh a sut a, hun pangngaiah 1-1 a ni.

Penalty shootout hmangin chak zawk zawn a ngai a, inkhel boruak a sang. Ajax aiawha pet Brian Brobbey leh Jurrien Timber ten an hlah a, PSV aṭanga pet André Ramalho leh Ibrahim Sangare ten an hlah ve bawk. Ajax tan panganaa pen chhuak Edson Álvarez-a'n a hlah leh a, Wolves aṭanga loan hmanga PSV-in an hawh Fabio Silva-a'n chakna goal a khung.

Nikum khan PSV-in final-ah Ajax 2-1 in an hneh a, kum zawnin an champion. Roger Schmidt hoin nikum khan an champion a, kumina champion puitu erawh Manchester United legend Nistelrooy a ni.

Nistelrooy hian PSV hi Dutch Super Cup leh Dutch Cup-ah a champion pui a, season khat pawh tling loah nomawi pahnih a chawi der tawh. Eredivisie-ah erawh PSV hi pahnihnaah an awm a, hmahruaitu Feyenoord chu point ngain an pha lo.