Napoli tan nghah rih hret a la ngai

Serie A champion an ni teuh ta hle a, champion thei dinhmunah pawh an ding - mahse Napoli chuan Italian football inelna sang bera nomawi chawi turin an la nghah leh rih hret a ngai.

Pathianni zan tir inkhelah Inter Milan chuan pahnihna Lazio chu 3-0 in an hneh, zan lama inkhel Napoli tan an mikhual Salernitana hneh chuan champion an nemnghet thei dawn tihna a ni.

Naples club ṭantute hi inkhelh hma aṭangin an boruak a lian a, an zauthau a ni ber mai. Diego Armando Maradona Stadium chhung leh a chhehvel chu a ri hut hut a ni ber mai, champion lawm chakin an tuihal.

Minute 62-naah Mathias Olivera chuan corner aṭanga ball kal a tauh lut a, chakna leh champion-na goal a nih ngei a rinawm. Mahse, mikhual Salernitana lamin goal luh aṭanga minute ruk hnuah Boulaye Dia hmangin an sut.

Serie A match khelh hmabak paruk an la nei. Napoli hian kum 33 hnua champion leh turin point hnih an la mamawh, point hnih an hmuh belh leh chuan midang result ngaihchan tel ngai miah loin an champion dawn.

Ningani zan hian Udinese an lenchilh dawn a, an chak a nih chuan Luciano Spalletti naute an champion dawn. Diego Maradona hunlaia an champion bak la champion ngai lo an nih avangin an tan chuan a hlu zual hle.

Napoli coach Spalletti chuan, "Min ṭantute khan champion lawm an chak a, kan tan an engkim an hlan. An lawmna leh duhthusam kan thlentir nghal thei lo kha player lam pawhin pawi an ti takzet.

"Keini pawhin champion kan chak tawh, duhthusamah chuan kan khelmualah ngei pawh ni se kan ti. A hma thei ang bera champion chu kan tum dawn a ni," a ti a, an match lehpekah chak an tum dawn.

Pathianni zan inkhel dangah Juventus chu Bologna nen 1-1 in an inhnehtawk. Old Lady hi point 15 pek kir an nih hnuah pawh an hnuaia awm Inter Milan, AC Milan leh AS Roma te aia an sanna chu point thum chauh a ni.

Serie A aṭangin team paliin Champions League an khel ṭhin. Napoli chu an dinhmun a ṭha tawk a, hmunruak dang pathum erawh na takin an inchuh dawn tih a chiang, inelna a la hmuhnawm zel dawn.