Lorient lakah PSG an chak lo

French Ligue 1 champion lai leh champion leh mai tura ngaih Paris Saint Germain kalkawng a awlsam vek bik lo. Paris club hi Pathianni zan khan an mikhual Lorient lakah 3-1 in an mualpho.

Minute 15-na lekah mikhual Lorient tan Enzo le Fee chuan Romain Faivr-a siamsak hmangin goal hmahruai a khung, goal luh aṭanga minute nga hnuah Achraf Hakimi chu yellow card pahnihna hmuh vangin hnawhchhuah zui a ni.

Player tlem zawk an nih hnuah PSG lamin Kylian Mbappe hmangin an siphurh an sut a, mahse Lorient lamin Darlin Yongwa leh Bamba Dieng te hmanga khung belhin khualmual aṭangin point thum an hawn.

PSG hian hliam vangin Neymar an la chhawr thei lo, an thiampuipa Lionel Messi-a'n damna a thlen thei bik lo a, player ṭha bik Mbappe meuh pawh nei mah se player tlem zawk ni chung chuan an tho chhuak zo lo.

Chak lo mah se Paris Saint Germain hian hma an la hruai tho. Ligue 1 match 33 an khelh aṭangin point 75 an hmu a, anmahni hnaih bertu Marseille chuan khelh zat inangah point ngain an phak lo - khelh hmabak match panga an la nei.