Baku-ah pawh Red Bull bawk an chungnung

Tun season Formula 1 chu Red Bull ni lo team dang tan chuan hmun a awm rih lo a ni ber mai. Pathiannni zana tlan zawh tak Azerbaijan Grand Prix-ah Red Bull car khalhtu Segio Perez a tlan chak ber a, a hnungah a teammate Max Verstappen a thleng.

Red Bull driver pahnih hnungah hian Charles Leclerc a thleng. Ferrari car khalhtu Leclers hi a hmasa ber aṭanga tlan ṭan a ni a, tun season intlansiak an neih tawh chin thlir chuan pathumna nih hi atan a chhe hran lo.

Tun season chhungin intlansiak 23 a awm dawn, chung zinga pali chu an tlan tawh. Tun dinhmunah champion lai Max Verstappen hian a ṭhianpa Perez lakah point rukin hma a hruai mek, a ngaihnawm chho dawn hle.

Mexican driver Perez chuan, "Season hmabak kan la ngah em em a, chuvangin engmah sawi lawk theih a la ni lo. Ka teammate Max nen hian iner loin kan inel a, car intlansiak nuam leh hlimawm kan hmachhawn chhunzawm zel ang," a ti.

Tun season intlansiak pali awm tawhah hian Red Bull driver pahnih hi intlansiak pahnihah chuan pakhatna leh pahnihna an ni a, ṭum thum chu dawhsanah (podium) an lawn dun ve ve - team dang tan chuan hmun a awm rih lo.

Beisei phak baka season hmang ṭha Fernando Alonso chu palinaah a thleng a, Aston Martin driver hi championship lamah pawh pathumna dinhmun luahtu a la ni. World champion vawi sarih ni tawh Lewis Hamilton chu paruknaah a thleng thung.