Table chung berah Bayern

Bayern Munich-in Pathianni zan khan Hertha Berlin 2-0 in an hneh a, Bundesliga hmahruaitu an ni leh ta. Bavarians tan hian Serge Gnabry leh Kingsley Coman ten goal an khung.

Bavarians hian German football inelna an thunun a, kum 2013 aṭang khan season liam ta thleng khan an la champion char char. Tun season-ah erawh Bayern an chefuh thei lo a, amaherawhchu an elpui Borussia Dortmund an chesual ve zel.

Dortmund hi kar khat chhung league hmahruaitu ni mah se tun kartawp khan table hnuai lama awm VfL Bochum nen 1-1 in an inhnehtawk. Bayern-in an hun ṭha an bawhpelh lo a, an rawn lehthal lehnghal.

Pathianni zan inkhelah hian Bayern hi nuamsain an chak lo a, first half-ah goal an khung thei lo. Minute 69-naah Joshua Kimmich-a ball vawrh luh fing chu 'dive' chungin Serge Gnabry-a'n a tauh goal.

Minute 10 hnuah Kimmich ke aṭanga ball chhuak chu Coman-a'n box chhungah la thlain Berlin keeper goalkeeper Manuel Riemann kap karah a khung.

Bayern-in 2-0 a hnehna an chan avangin Dortmund aiin point khatin an hmu sang a, match li khelh hmabaka an chak vek chuan Thomas Tuchel-a hote an champion dawn.

Tuchel-a hote hian Werder Bremen, Schalke, RB Leipzig leh FC Cologne an hmachhawn ang. Bavarians elpui Dortmund-in Wolsburg, Borussia Monchengladbach, Augsburg leh Mainz te an hmachhawn ve bawk ang.