Hming dang zawng aiin Parker!

Kum 39 mi lek a la ni a, football coaching-ah tawnhriat a la nei tam lo hle - mahse, Fulham-in an player hlui Scott Parker chungah rinna an nghat a, an tihsual lohzia an inhre tawh ang. 

Fulham hian kum 2018 khan playoff final-ah Aston Villa hnehin Premier League an inpetkai a, nipui transfer-ah pound maktaduai 100 chuang sengin player an lalut. Mahse, Fulham-in beisei an phak lo - season tluanin an talbuai a, 2018-19 season-a league match 38 an khelh aṭangin vawi 26 an tlawm a, goal 81 tehmeuh an chhuah!

Slavisa Jokanovic hmangin bul an ṭan a, an talbuai hnuah Premier League nomawi lo chawi tawh Claudio Ranieri lam an hawi. Leicester City tana hna ropui lo thawktu pawhin eng ruai a ang lo a, Parker chu season tawp thleng atan an ruat. Parker tan thilmak thlentir turin hun a tlem tawh a, an relegate - mahse, season tluan a enkawl meuh chuan Premier League-ah a kirpui lehnghal. 

England tana vawi 18 inlan thei Parker chuan, "Season hmasa khan tihsual lian tak tak kan nei a, mahse khang kan tihsual aṭang khan inzir kan mamawh a, kan inzir ngei bawk ang. "Khawvela league ṭha ber khel turin kan tling a, player ṭha ber ber leh team ṭha tak tak an khelh avangin league nunrawng tak a ni a, ka hmaa chona inchhawp hi ka hria a ni," tiin a phur hle. 

Parker chuan sawi zawmin, "Ka player-te rilrua tuh ngheh tlat kan tum chu he club hian kalphung nghet a nei tih hi a ni. A chang chu innghahna lungphum chuan thui tak min hruai ṭhin. Talent nei ṭha ber ber player kawl mah ila, kan innghahna lungphum a ngheh loh a, vaivuta indin mai kan nih chuan kan thamral leh mai ang. 

"Zawi zawiin hma kan sawn zel theih ka beisei a, a harsa dawn tih pawh ka hria. Kan beisei anga kan ti thei ta lo a nih pawhin min tungding turin innghahna lungphum nghet sa kan nei a ni," a ti. Frank Lampard-a'n Derby County-a a season hmasa berah playoff a khelh avangin fak a hlawh a, Chelsea coach hial ni turin a lut - Parker-a'n Lampard aia hna ropui zawk thawkin a team chu Premier League-a inhlankaipui a, a hmaah chona hautakin a hmuak. A hmachhawn dan en a châkawm ta.