Man City mikhual tur West Ham
Manchester City-in league match ruk khelh tur an la neihah vawi nga an chak a nih chuan Pep Guardiola hnuaia a vawi khat nan a zawnin Premier League nomawi vawi thum an chawi dawn. Cityzens hian zanin dar 12:30 hian Etihad Stadium-ah West Ham an mikhual ang.
Pep-a hote hian Hammers bakah hian Leeds United, Everton, Chelsea, Brighton leh Brentford te an la hmachhawn dawn. City hian an elpui ber Arsenal meuh 4-1 a an hneh avangin champion chianga ngaitu an ṭhahnem a, chutihrualin chhiarkawp dan aṭanga teh chuan an dinhmun hi a la him lo.
A zawna vawi 3
Man City hian Pep hnuaiah a zawnin vawi hnih an lo champion tawh a, vawi thum champion erawh an la nei lo. Premier League-a manager ropui ber Sir Alex Ferguson-a hnuaiah Manchester United khan ṭum hnih a zawna vawi thum champion an nei a, Spanish manager hian record ropui hi a nihrual thei a, a aia ropui zawk siam thei dinhmunah a ding bawk.
Pep-a hote hian a zawna league nomawi vawi thum an chawi theih bakah treble champion thei dinhmunah an la awm bawk. City hian Champions League semifinal-ah Real Madrid an hmachhawn dawn a, FA Cup final-ah Manchester United an hmachhawn bawk ang.
City hi inelna lian pathumah champion rinkai an ni vek a, chutihrualin football-ah chuan engmah chiang a la awm lo. Pep-a leh a hote hi ropuina lian thamin a hmuah rualin an la 'arte lukawn' thei tlat.
City vs Hammers
Man City hian Erling Haaland leh Julian Alvarez te goal hmangin Fulham 2-1 in an hneh a, awlsam taka chak tura ngaih ni mah se hnehna an chang hram tihin a sawi theih.
Cottagers an hmachhawn ṭum hian Kevin de Bruyne chu inliam vangin squad-ah a awm lo a, Belgian midfielder tel lo hian City hi an nih tur ang an ni pha lo. West Ham lakah pawh hian De Bruyne hi a tel theih a beiseiawm lo a, Pep-a hote hian ball sem thiam bik midfielder hi awm lo hi an tuar thei ve tlat.
Chutihrualin, Pep-a'n player aiin coach pawimawh zawkna a rawn lantir leh ṭhin a, Spanish manager hian match pawimawhah game a siksawi mawi ṭhin hle. Arsenal an hmachhawn ṭuma Haaland leh De Bruyne hna thiam taka a siamrem avangin Pep-a'n fak a hlawh a, Fulham lakah Haaland leh Alvarez te an inkawp rem viau bawk.
City hi KDB awm lo pawh ni se chak tura rinkai zawk an ni dawn a, chutihrualin West Ham erawh zuam chi an ni bik lo. Hammers hi 'relegation battle'-a an tel phak avangin khelh an harsa dawn a, David Moyes-a'n City an hmachhawn dawn avangin tlarhnungah player a hnawh hnem bawk ang.
London Stadium-a club pahnih an inhmachhawn ṭum khan Haaland leh De Bruyne te goal hmangin City-in 2-0 in hnehna an chang. Tun ṭumah pawh City rinkai an ni dawn a, chutihrualin Hammers leh Arsenal ṭantute chuan result danglam hmuh an beisei dawn a ni.
Pressure tawng hnem tawh Pep-a ‘City’
2017–18 : Man City (C-100 pts)
Manchester City-in Pep Guardiola hnuaia season hmasa berah nomawi pakhatmah an chawi lo a, Premier League-ah phei chuan pathumnaah an awm. Season hnihnaah erawh Pep-a'n a zia a chhuah a, match 38-ah point 100 tehmeuh an hlawh chhuak.
Club thuneituten league-a champion pui tawhtu Roberto Mancini leh Manuel Pellegrini te an ban a, result ṭha zawk beiseiin Pep an lalut. Spanish manager hnuaiah season khata point 100 hmu hmasa ber leh hmu thei awmchhun an ni.
2018–19 : Man City (C-98 pts)
Premier League champion harsatzia a lang. Man City hian December thlaah Chelsea, Crystal Palace leh Leicester City te an hneh loh avangin Liverpool-in nomawi chawi an inbeisei hman.
Mahse, Pep-a hote hian January thla tawpah Newcastle United lakah an tlawm ve leh zeuh tih loh chu an chak fai vek. City hneh zingah hian an elpui Liverpool pawh an tel a, match 14 an chak zawn chungin Jurgen Klopp-a hote aiin point khat chauhin an hmu tam. Season chawhnu lam zawng chu 'pressure' na tak nen an khel char char tihna a ni.
2019–20 : Man City (2nd - 81 pts)
Man City-in elpui Liverpool lakah league nomawi an chan a, Jurgen Klopp leh Reds vanglai an tawn vang a ni ber. Liverpool hian point 99 tehmeuh an hmuh phak avangin champion an phu a, City erawh Aymeric Laporte inhliam an tuar.
Pep-a'n defender lai a lalut lo a, chutihrualin Rodri leh Joao Cancelo lakluh nan pound maktaduai 120 vel an seng pha tho. City-in Reds lakah nomawi chan mah se match hnuhnung pangaah an chak vek!
2020–21 : Man City (C-86 pts)
Man City-in an tihsual insiam ṭha nghalin transfer bazarah defender ṭha pahnih Ruben Dias leh Nathan Ake te an lalut nghal. League an thunun a, an dinhmun a ṭhat hma deuh avangin season tawp lamah inthlah dulin Champions League lamah an insawrbing. Pep-a hoten point 86 an hmu a, anmahni hnaih bertu Manchester United-in point 74 an hmu pha chauh.
City hian league bakah League Cup nomawi chawi tel mah se FA Cup (semifinal) leh Champions League (final)-ah erawh an tum ram an thleng zo lo a, Chelsea lakah an tlawm ve ve.
2021–22 : Man City (C-93 pts)
Season liam ta khan Manchester City an champion a, nomawi chawi turin match tawp berah chak a la ngai. City khingpui hi Liverpool legend Steven Gerrard-a enkawl Aston Villa a ni a, an chesual a nih chuan Gerrard-a club hlui Reds an champion dawn.
May 22, 2022 kan thlir let chuan Etihad Stadium-ah Villa-in Matty Cash hmangin minute 37-naah an khung a, Philippe Coutinho hmangin minute 69-naah goal hnihna an khung leh bawk.
City tan nomawi chawi turin minute 20 chhung lekin goal thum an mamawh a, Pep Guardiola hote meuh tan pawh thil harsa bik a ni. Mahse, City-in minute ruk chhung lekin goal thum an khung. Ilkay Gundugon-a'n goal hnih a khung bakah Rodri-a'n a khung bawk a, minute 81 a nih chuan an duh khawp goal an khung der.