Liverpool - Champions League an khel dawn em?

Season ṭantira champion tum, season tawp lama European football khelh phak tum Liverpool chu zanin dar 12:30 hian an inlan dawn a, Anfield-ah Fulham an mikhual dawn.

Reds hi season tawp hnaih lamah an insiamṭha ṭan niin a lang a, an league match hnuhnung parukah tlawm an nei lo - vawi hnih an draw a, vawi li an chak. Tun season-a an tlawm loh tluan rei ber a ni.

Hei vang hian fans tam takin an beisei ngam tawh loh Champions League pawh an sawi ri ve leh dek dek ta a, Jurgen Klopp-a'n European football-a club inelna sang ber hi an beisei tawh loh thu sawi mah se pressure lak kian tumna mai niin a lang.

Zaninah pawh Liverpool hian thih thain an bei ang tih a chiang a, season thara Champions League khel turin tlawm a thiang tawh lo - inkhel a hmuhnawm loh ring suh.

Beiseina

Liverpool hian league match 33 khel tawhin point 56 an hmu mek a, hmahruaitu Manchester City (76 points) leh Arsenal (75) chu Reds tan um phak theih an ni tawh lo a, season tharah Champions League an khel dawn.

Pathumnaah point 65 neitu Newcastle United awm mekin, palinaah Manchester United chu point 63 nen an awm mek - Liverpool tan season thara Champions League khel turin an hmabak match-a chak vek a ṭul a, United leh Magpies chetsual an chân tel a ngai bawk.

A tawi zawnga sawi chuan, Liverpool kutah season thara CL an khelh leh khelh loh hi a innghat tawh lo a, midang chetsual an chân tel a ngai - hei tak hi Liverpool hmabak tihautaktu a ni.

Liverpool hian an league match hnuhnung berah Tottenham Hotspur chu 4-3 in an hneh a, 3-0 a hma an hruai hnuah injury time-ah Diogo Jota goal hmangin an chak hram a, an vannei takzet - CL khel turin khatianga khelh fo chu a chi loh ang!

Mahse...

Tarlan tawh angin Reds tan anmahni chet ṭhat ngawt hi a tawk zo tlat lo. Pathumna Magpies an phak lohna hi point kua a ni a, United an phak lohna hi point sarih chauh angin lang mah se match khatin an khel tam thung.

Liverpool hi an hmabak match ngaah chak vek ta se, point 71 an nei dawn. Mahse, hei hi CL khelh nan a tawk lo thei - Magpies-in match nga an khelh hmabakah point ruk an hmuh phak loh a ngai dawn tihna a ni a, Eddie Howe-a team-te hi chuti thuta an tlakhniam chu a rinawm chiah lo.

Reds-in beiseina dang an neihna chu United a ni. Mahse, United tan pawh league match ruk hmabak la awmah point riat hmuh tlin loh a ngai a, Erik Ten Hag-a naute hian team lian tia chhal theih chu Chelsea chiah an hmachhawn tawh dawn.

Mahse, Blues ai mah chuan Brighton & Hove Albion leh West Ham hi point hloh theihna tur zawk niin a lang a, Liverpool fan-te tan ṭawngṭai uluk a ngai khawp ang!

Europa tal...

United boss Erik ten Hag chuan, "Top four-a season khar turin kan kutah engkim a la innghat," a ti a, team dang khelh danah an innghah loh thu a sawi - a sawi dik a, hetiang boruak kara Reds beisei theih pakhat chu Europa League a ni.

Premier League-a pangana chinin Europa League an khel dawn a, Liverpool tan hei chu beisei ngam a ni - table-ah pangana an ni mek a, season thara European football an khelh leh khelh loh chu an kutah a innghat.

United-in top four-a season an khar chuan parukna pawhin Europa League hi an khel thei ang. FA Cup champion-in Europa League an khel ṭhin a, United leh Manchester City an inhmachhawn dawn.

Final khel pahnihin Champions League an khelh chuan, FA Cup hmun ruak hi Premier League-a parukna chanvoah a awm dawn tihna a ni - Spurs, Aston Villa, Brighton leh Brentford thlengin beiseina a awm thei ang.

Ta se...

Manchester City-in Champions League semifinal an lut tawh a, Pep Guardiola team-te hi champion thei dinhmunah an ding mek - CL champion tan an ram league aṭanga khelh phak loh pawhin champion quota-in season tharah CL a khelh theih.

City hi champion ta se, Premier League-a pangana tan CL khelh theih a ni ang em, tih chu zawhna awm thei a ni a, a chhanna chu, "Khel thei lo ang," tih a ni thung - City hi champion pawh ni se, champion quota-a an chan tur hmun ruak hi qualifying round lamah siam rem tur a ni.

Hetihlai hian Europa Conference League a la awm bawk - he hmun hi Carabao Cup champion pual a ni a, champion hi United an nih avangin Premier League-a pasarihna tan ECL khelh theih a ni dawn.

Tun season-a ECL semifinal lut West Ham tan league table aṭanga European football khelh beiseina a awm tawh lo. Mahse, he team hi ECL-ah an champion chuan season tharah Europa League an khel dawn a, English club pariatin European football an khel dawn tihna a ni ang.