Leeds United Javi Gracia - Out; Big Sam - In?

Season a tawp dawn hnaih meuh chuan Premier League lamah Big Sam hming a rawn ri leh ta. 'Relegate Battle' hmachhawn ṭhang Sam Allardyce hi Leeds United nen sawizawm a ni.

Leeds hian nimin khan an manager Javi Gracia chu an ban a, director of football Victor Orta chu club nen inhriatthiam tawnnain a chhuak bawk. Tun dinhmunah Leeds hi 17-naah an awm mek a, 18-na Nottingham Forest nen point 30 ve ve hmuin match li chauh khelh tur a awm tawh.

Whites hian nikum February thla khan Premier League kaipuitu Marcelo Bielsa banin American manager Jesse Marsch an lalut. Marsch hoin Leeds-in season bul an ṭan a, chak an harsat avangin February 6 khan an ban.

Leeds hi England futsal team enkawl tawhtu Michael Skubala hnuaiah an khel zui a, February 21-ah Javi Gracia an lalut. Spanish manager hnuaiah pawh Leeds hian result ṭha an nei thei meuh lo a, match hnuhnung pangaah vawi li an chak lo a, vawi khat an inhnehtawk.

May 6, Inrinni hian Leeds hian Manchester City an tlawh dawn a, an khelh hmabak dang pathum hi Newcastle United, West Ham United leh Tottenham Hotspur te an ni. Whites hi point hmu tawh lo thei dinhmunah an din avangin Big Sam chunga 'risk' an thlang niin a lang.

Kum 68 mi Big Sam hian Bolton, West Ham leh Everton te a enkawl tawh a, relegation fight thiam bik tia sawi ṭhin a ni. Amaherawhchu 2020-21 season khan West Brom-in Sam Allardyce hi an lalut a, a chhan thei bik lo. Hemi season hi Allardyce-a'n a club enkawl Premier League aṭanga a relegate pui awmchhun a ni.

Leeds leh Big Sam te hian indawrna an nei mek a, Leeds chief executive Angus Kinnear nen hian West Ham-ah an thawk dun tawh. Whites ṭantute tan Big Sam hi a phurawm viau lo a ni thei a, mah se an manager lak theiha ṭha bera ngaih a ni thung.