Premier League 'tla' tur a chiang har - boruak a sang!

Leicester City-in Everton hneh se, relegation zone hlat lehzual tur an ni a, mahse, Foxes hian Thawhṭanni zan khan an mikhual Everton chu 2-2 in an inhnehtawkpui a, season thara Premier League khelh chhunzawm turin hmabak a hautak chhunzawm zel.

Everton hian Dominic Calvert-Lewin-a penalty hmangin goal hmahruai khung mah se Foxes-in Caglar Soyuncu leh Jamie Vardy hmangin an chhanglet a, first half hun pek belhah 3-1 a hmahruaina remchang an nei bawk.

Mahse, James Maddison chuan Foxes tan penalty a chhuih lut thei lo a, Jordan Pickford chuan a dansak - minute 54-naah Alex Iwobi chuan Everton tan khung ve lehin, Maddison-a penalty chhuih luh loh a pawi zui.

Foxes-in point thum aiah point khat an hlawh chhuak a, table-ah 16-na ni zui mah se 18-na Nottingham Forest nen an point hmuh zat a inan tho avangin hmai uang thei an ni lo - an dinhmun a chiang lo zel.

A goal hma

Foxes player James Maddison-a'n Everton nen an inkhelh hmain fan-te puihna an tan a pawimawh ṭhin thu a sawi a, fan-te au thawm chuan player-teah phurna nasa tak a pek ṭhin thu a sawi.

Leicester ṭantuten Maddison-a thusawi an hre reng a, King Power Stadium-ah Foxes fan-te thawm a ṭha takzet. Mahse, Premier League champion hlui ṭantuten an hmuh châk an hmu lawk lo a, minute 15-naah ngawihtirin an awm.

Foxes defender Timothy Castagne chuan ṭul lo takin Calvert-Lewin a titlu a, penalty a chawi. English striker hi penalty pet turin a lo pen chhuak a, Foxes lakah zahngaihna a lantir lo.

Mahse, Leicester-in tlawm an tum lo - goal an chhuah aṭanga minute sarihna lekah Soyuncu a inlar a, nipui transfer-a Atletico Madrid pan tur defender hian Wout Faes siamsak chu si phurh sutna goal ni turin a khung.

Everton 'comeback'

Si phurh an sut hnuah Leicester an phur sawt a, mahni mualah chak ngei an tum - minute 33-naah club chhandamtu ni fo ṭhin Jamie Vardy a inlar a, English striker hian Maddision-a ball pek ṭha zet chu Pickford-a chawpa bumin goal-ah a chantir.

Leicester an kaltluang laklawh a, first half hun pek belhah penalty an hmu - Maddison-a'n goal-ah chantir ngat se, Foxes hi mahni muala khel an nih bawk avangin chak chiangah sawi ngam tur an ni a, mahse, Pickford-a'n a dansak!

Goal dang lut loin chawlhlawk hman zui a ni a, si phur zawk ni mah se penalty an chhuah loh miau avangin Everton an phur thar - Alex Iwobi chuan minute 54-naah si phurh sutna goal a rawn khung a, 2-2 in inkhel a tawp.

Leicester-in league match li khelh tur an la nei a, Fulham, Liverpool, Newcastle United leh West Ham an la hmachhawn dawn avangin an hma hun a chiang lo hle.

A hming Pickford

Everton tan point an hlawhchhuah theih chhanah keeper Pickford chu fak tlak a ni a, Maddison-a penalty pet dang tur hian a inpuahchah ṭha hle - a bottle-ah Foxes player, penalty pet ṭhinte penalty pet dan ziak a dah sa a, inkhelh laia penalty thleng thei atan a inpuahchah lawk.

Bottle-ah hian 'Maddison 60% centre' tih chu a awm. Chumi awmzia chu English midfielder hian penalty a petin, a pet zinga 60% chu a laiah a pet tihna a ni. Maddison-a'n penalty a pet ta ngei a, Pickford hi che sawn duh loin, a laiah a ding a, a dang chiang hle.

Everton hian an duh ber point thum hlawh chhuak lo mah se goal thum chhuah thei dinhmun aṭanga comeback an nih avangin player an phur thar ang tih a chiang a, Foxes aiin draw result-ah an lawm zawk ang.

Mahse, Merseyside club hian league-ah Brighton & Hove Albion, Manchester City, Wolverhampton Wanderers leh Bournemouth an la hmachhawn dawn a, English top flight league-a inhamtang turin an kalkawng a awlsam bik lo.