Last 16-ah Tsitsipas a lut

Madrid Open khelh laiah champion thei tur zinga mi Stefanos Tsitsipas chuan last 16 a inhlangkai. Greek tlangval hian Sebastian Baez chu straight set hmangin a hneh a, a hneh tak player chu ramsa ang maia cherang a nih thu a sawi.

Seeded pathumna Tsitsipas tan world number 31 Baez hneh hi thil awlsam a ni bik lo, mahse set hnuhnung ber an khelh laiah che fuh zawkin game hmasa pathum a lak hnuah 7-5, 3-6, 6-3 in hnehna a chang.

Tsitsipas chuan, "Tennis ka khelh tawhah chuan ka khelh ṭhat ber ṭum a ni hial ang. Baez kha a che rang a, a nihna takah chuan khawvela ramsa tlan chak bik 'Cheetah' ang mai niin ka hria. Point khat lek pawh hmu turin a thawkrim nasa hle," a ti.

Tun season kal laiah Tsitsipas hian nomawi a la chawi lo. Australian Open bakah Barcelona Open final lut mah se a chak lo zawkah a ṭang ve ve a, clay court hi a inkhelh thiamna hmun a nih avangin champion ngei a tum ang.

Inkhel dangah Daniil Medvedev chu a dinhmun vawi hnih ngawt hniam zawk hman mah se a tho chhuak. Russian tlangval hian a hnam pui Alexander Shevchenko chu 4-6, 6-1, 7-5 a hnehin last 16 a inhlangkai ve bawk.

Tun season kal laiah Medvedev hian match 33 hnehna a chang tling ta chiah a, ṭum li chak loh a nei tawh thung. A match lehpekah chuan Aslan Karatsev a tum leh ang, ani hian seeded 16-na Alex de Minaur chu 6-3, 4-6, 6-4 in a lo hneh ve thung.

Seeded pariatna Taylor Fritz pawhin Cristian Garin 6-1, 7-6 (4) in a hneh a, seeded 11-na Cameron Norrie erawh Zhang Zhizhen lakah 2-6, 7-6 (2), 7-6 (2) in a chak lo. Bernabe Zapata Miralles pawhin Roman Safiullin chu 6-3, 3-6, 6-3 in a hneh.

French Open atana inbuatsaihna tournament-ah hian world number 2 Carlos Alacaraz pawh a inlan, seeded pakhatna pek niin nizan khan last 16 match a khel a, result erawh kan hre hman lo thung a ni.