Harden hoin 76ers an chak hmasa
James Harden-a point 25 hmangin Philadelphia 76ers chuan Boston Celtics lakah 119-115 in hnehna an chang. Eastern Conference semifinal-ah 76ers hian game an la hmasa a, tlang tur erawhin hmabak a la tam.
TD Garden-a inkhelah Harden a langsar fal hle a, a ṭhiante zingah point 26 neitu Tyrese Maxey, Tobias Harris (18 points), De'Anthony Melton (17 points) leh Paul Reed (10) ten an thlawp ṭha hle bawk.
Sixers coach Doc Rivers chuan, "James Harden hi chu player danglam tak a ni, khingpuite nawr leh mahni inven hun a hria," tiin an khingpui player a dahsan thu a sawi a, hun tawp hma second riat chauh awm tawha 3-points a luh pawh inkhel tidanglamtu a nih thu a sawi bawk a ni.
Boston Celtics hian hliam vangin Joel Embiid an chhawr thei lo. NBA All-Star a vawi ruk tel tawh hi khup hliam vangin a chawl mek, an match hmasa lama Brooklyn Nets nen an inkhelh laiin a hliam a, a lo kir hun tur hriat a la ni lo.
Jayson Tatum-a'n point 39 nei mah se chak nan a tawk zo lo. An chak loh dan erawh hun tawp dawn lama an hmahruaina an hum theih loh vang a ni a, quarter hnuhnung berah pawh 115-114 a hmahruai lai an ni.
Tatum-a free throw hmangin Bostons an sang zuai a, mahse yard 25 zeta hla aṭangin Harden chuan 3-points vawm lutin an pawtthla zui, a tawpah chuan Harden awmna 76ers an chungnung ta nge nge a ni.
May 4, Ningani zing dar 5:30-ah game 2 khelh leh a ni dawn, mualneitu Boston Celtics tan TD Garden-a tlawm nawn a pawi thei ang. Eastern Conference seeded pahnihna hian thawhchhuah ngei an tumin a rinawm.
Western Conference lamah chuan Denver Nuggets dinhmun a ṭha zel. Nuggets hian Nikola Jokic-a point 39 hmangin Phoenix Suns 97-87 in an hneh a, best of seven series khelh turah 2-0 in hma an hruai mek.
Nuggets coach Michael Malone chuan, "Nikola hi chu tuan season atana player hlu ber a ni chiang hle. A duh a nih phawt chuan kawng hrang hrangin a khingpui te tih beidawn dan a hria, basket neih tuma a beih ṭhin dan hian min tilawm," tiin point 39 neitu Nikola Jokic a fak hle.
May 6, Inrinni zing dar 7:30 hian Footprint Center-ah game 3 an khel chhunzawm leh dawn a ni.