US Open khel thei tur Djokovic

Novak Djokovic chuan US Open a khel thei dawn. United States chuan tun hnai khan hripui leng chungchanga inkaihhruaina dan thar an ruahman a, hripui laka invenna la lo tan pawh an ramah a zin luh theih tawh dawn a ni.

World number 1 Djokovic hian Covid-19 laka invenna vaccine a la duh lo, season hmasa pawh khan Australian Open leh US Open a khelh theih loh phah hial, tun season kal laiah pawh Indian Wells leh Miami Masters a khel thei lo.

US ram zin lut tur tana inkaihhruaina hi May 12 aṭanga hman ṭan tur niin, hard court inelna lian US Open hi September thlaa khelh tur a ni thung. Grand Slam vawi 22 champion tawh Novak tan chanchin ṭha a ni.

White House thuchhuah tarlan dan chuan, "Tuna inkaihhruaina dan kan hman lai hi May 11-ah a tawp dawn a, hemi rual hian khualzin tana inkaihhruaina dan hman pawh a tawp zui nghal ang," an ti.

Djokovic hi tun dinhmunah chuan hliam vangin a chawl mek a, tun thla chawhnu lama khelh tur French Open-ah chuan inlan thei tura ngaih a ni. Rafael Nadal nen Grand Slam title 22 ve ve an nei mek, nomawi lian tham ngah zawk nih an tum ang.