Playoff khel tur a la chiang lo

Championship-ah champion a chiang tawh a, Burnley an champion bakah Sheffield United-in pahnihna dinhmun an nemngheh tawh avangin Clarets hnung zuiin season tharah Premier League an khel dawn. Hmun ruak pakhat a la awm a, playoff hmanga zawn tur a nih avangin hei erawh a la chiang lo thung.

Thawhṭanni zan khan Blackburn Rovers chuan playoff beiseina chhi nung turin Luton Town chu 1-1 in an chelh. Playoff-ah hian team pali an tel dawn a, pathumnaa awm Luton Town hi an chiang tawh a, hmun ruak pathum a la awm. Palina dinhmun luah mektu Middlesbrough-in Thawhṭanni zanah Rotherham 1-0 in hneh lo mah se an dinhmun a la ṭha.

Hmun ruak pahnih dang erawh Coventry City, Millwall, Sunderland, West Brom leh Blackburn Rovers ten an la inchuh dawn a, Championship-ah league match thum chauh khelh tur awm tawhin season tawp lam boruak a hot ang.