Goal khung nuam ti Castellanos

Real Madrid laka goal li a khung hnuah Valentin Castellanos chuan goal a khung leh ta a, Girona chu anni aia team ṭha zawka ngaih Sevilla lakah a chakpui leh ta - Thawhṭanni zan khan an mikhualna ramah Sevilla hi 2-0 in an hneh.

Sevilla hian Girona an hmachhawn hma hian inelna hrang hrangah match li chu a zawnin hnehna an chang tawh a, league-ah Valencia (2-0), Villarreal (2-1) leh Athletic Bilbao (1-0) an hneh a, Europa League quarterfinal aṭangin Manchester United an pet chhuak bawk.

Tun season-a an coach pathumna Jose Luis Mendilibar hnuaiah Sevilla hi an insiamṭha viau a, league match ngaah vawi li chakin vawi khat draw an nei - Girona lakah pawh chak tura beisei an ni.

Mahse, Real lakah meuh 4-2 a chak thei Girona an inringtawk a, minute 23-na lekah Juanpe Ramírez chuan goal hmahruai khungin, New York City aṭanga loan-a an hawh Castellanos chuan minute 55-naah belhchhah bawkin, 2-0 in Girona an chak.

Hetihlai hian Real Mallorca khelmualah Athletic Bilbao an vannei a, hun pek belh minute ruknaa Inaki Williams goal hmangin Real Mallorca chu 1-1 in an inhnehtawkpui.

Mallorca hian South Korean midfielder Lee Kang-in hmangin goal hmahruai an khung a, mahse, 90+6-ah Bilbao hian sawisel theih taka penalty hmuin, 1-1 in team pahnih an inhnehtawk. Raúl García chuan Iñigo Ruiz de la Galarreta kut pet perin penalty hi a hlawh chhuak a, Bilbao an vanneih phah.

La Liga hi nizan khan khelh chhunzawm niin, Barcelona leh Real Madrid an inlan a, result kan hre hman lo. La Liga hmahruaitu Barca hian Osasuna mikhualin, Real-in khualmualah Real Sociedad an lenchilh thung.

Atletico Madrid chu zanin dar 1:30 hian an inlan dawn bawk a, Cadiz an mikhual ang. Diego Simeone-a naute hian an league match hnuhnung 16-ah vawi khat chiah tlawm an nei - vawi thum draw in, vawi 12 an chak.

An hneh loh awmchhun hi Barcelona niin, khualmualah 1-0 in an tlawm a, mahse, hemi hnuah hian Real Mallorca (3-1) leh Real Valladolid (5-2) chu a zawnin an hneh leh tawh.

Pathianni zan khan Valladolid hi an lenchilh a, Nahuel Molina, Jose Maria Gimenez, Alvaro Morata, Joaquin Fernandez (own goal) leh Memphis Depay ten Atletico tan goal khat ṭheuh an khung.

Valladolid tana Cyle Larin (penalty) leh Sergio Escudero te chuan goal khat ve ve khung ve mah se mualpho zualpui khuhna chauh an ni.