Kohli leh Gambhir an intibuai

India cricket-a hming langsar Virat Kohli leh Gautam Gambhir chu Thawhṭanni zan Indian Premier League inkhel zawhah an inchhang thinrim a, an pahnih hian hemi match-a an hlawh 100% chawitir an ni.

Ekana Sports City, Lucknow-ah Royal Challengers Bangalore-in bat hmasak an thlang a, Faf du Plessis (44) leh Virat Kohli (31) te zarah 126/9 runs an tlin hram. Lucknow Super Giants tan target harsa tur niin a lang lo mah se Bangalore bowler te an che ṭha a, Super Giants hian over 19.5-ah 108 runs siamin an thi fai vek.

RCB hian Lucknow lakah 18 runs-in hnehna an chang a, inkhel zawha thil thlengin sawi zui a hlawh. Kohli leh Giants mentor Gambhir te chu camera aṭanga a lan danin an inchhang thinrim tih a lang a, an ṭawng erawh a hriat theih loh.

Gambhir hian, "Kan intawn leh hunah kan dah ṭha dawn che, chuvangin tunah hian lawm chiam suh," tiin Kohli bulah hian a sawi niin tarlan a ni a, India captain hlui Kohli hian ngawih chuh loin a chhang let ve bawk. Player pahnih hi India team-ah hun rei tak an khel dun a, Gambhir hi player a nih lai pawhin huang tau ve tak niin Pakistani legend Shahid Afridi nen pawh buaina an lo nei tawh a ni.