Asian Games khel thei lo Saina

Indian badminton star Saina Nehwal chuan Asian Games a khel thei dawn lo. London Olympic bronze medalist hi hliam na tak nei ni lo mah se inelna sang hmachhawn turin a inpeih tawk lo nia sawi a ni.

Inelna hi September 23 aṭanga October 8 chhunga khelh tur a ni dawn, a hun chu a la hla deuh. Mahse, inelna lian hmachhawn tur zawnna hi May 4-7 chhung hian Jwala Gutta Academy of Excellence, Telangana-ah neih tur a ni ang.

Badminton Asso-ciation of India (BAI) secretary Sanjay Mishra chuan, "Saina Nehwal a la inkhel ve thei lo, a taksa dinhmun a la ṭhat tawk loh avangin a inhnukdawk a, ani bakah hian Kushal Raj leh Prakash Raj te pawh an inhnukdawk bawk," a ti.

India rama badminton thuneitu sang BAI chuan player ṭhenkhat chu Asian Games khel tur hian enchhin leh kher ngai loin an thlang sa. Olympic medal vawi hnih dawng tawh PV Sindhu (world number 11) leh HS Prannoy (9) te chu thlan sa an ni.

Sindhu leh Prannoy te bakah hian mipa doubles pair Chirag Shetty leh Satwiksairaj Rankireddy, hmeichhe doubles pair Treesa Jolly leh Gayatri Gopichand (19) te pawh tling sa an ni bawk.