Serie A Champions League ticket inchuh boruak a nung
Italian football inelna sang ber Serie A-ah Napoli an champion dawn a, match ruk aṭangin point hnih chiah an mamawh tawh. Naples club dinhmun a chiang tia sawi ngam a ni a, midang dinhmun erawh a la chiang lo takzet.
Pahnihna Lazio leh parukna AS Roma inkarah point li chiah a awm, nasa takin an dinhmun a la inthlak kual thei tihna a ni. Lazio, Juventus, Inter Milan, AC Milan leh AS Roma ten season thar Champions League ticket an inchuh dawn - Atalanta pawh sawi bo a la thiang lo.
Harh ngai Juve
Coppa Italia semifinal aṭangin an tla a, league match an khelh hnuhnung pathumah an chak zo lo vek bawk - tun hnaiah Juventus an che fuh thei lo. Old Lady hian season thara UCL khelh an duh a nih chuan an harh chhuah vat a ngai.
Massimiliano Allegri naute hi point 15 an paihsak kha pek kir an ni a, hei hian an season chhe lutuk tur a chhanhim rih deuh niin a lang - pathumnaah awmhmun an khuar mek, match khat lekah an dinhmun hi danglam thei reng a la ni thung.
Juve hian zanin dar 9:30-ah Lecce an mikhual dawn. Allianz Stadium-ah an chak a nih chuan Lazio tlan pelin pahnihna an ni lailawk ang, an chak lo a nih erawh chuan, an hnuaia awm Inter Milan an chak leh si chuan palina an ni daih thei bawk.
Turin club hian tun hnaiah goal khung an harsat, striker Dusan Vlahovic leh Arkadiusz Milik te hliam vangin an buai ngun a, an dam pawhin beisei ang chhanna an nei hleithei lo - goal khung an harsat laia Bologna laka Angel di Maria inlan lo khan sawi zui a hlawh.
Allegri chuan, "Bologna lama zin turin Di Maria kha a inpeih lo, na tak chu ni lo mah se a ke rêk a hliam, a lo kir thuai erawh ka beisei," tiin tunkar tir khan a sawi. Zaninah Argentine forward hi inlan thei tawh tura beisei a ni.
Milan club pahnih
Italian football sawi chuan AC Milan leh Inter Milan hming lam rik a ngai ṭhin. Milan club ropui pahnih hi Champions League semifinal-ah an intawng dawn. UCL an khelh hmain Serie A match pahnih ve ve khelh tur an la nei.
Zanin dar 12:30 hian an inlan rual dawn. Milan hian tlak hlau Cremonese an mikhual dawn a, inkhel dangah Inter Milan chuan Verona an lenchilh thung ang - hnehna chan duh ve ve ni mah se, tun hnaiah match a tam avangin player insiksawi a ngaiin a rinawm.
Milan coach Stefano Pioli chuan, "Kan match hnuhnung ber kha thlirkir ila, hun tawp dawnah goal hnih a lut a, pakhat chu keimahni thun niin Roma nen 1-1 in kan inhnetawk a nih kha. Kan goal khung kha hla viau mah se si phurh sutna a ni tlat.
"Chuvangin goal kan khung a nih chuan chakna goal ni thei se duhthusam a ni. Point kan mamawh a, league-a kan dinhmun siamṭhat hi kan tihmakmawh a ni," a ti a, zaninah tlak hlau lakah sa huai a ser ngeiin a rinawm.
Milan, Inter leh Roma ten point 57 vek an hmu mek - inelna boruak a nung ṭha vet vet hle. Jose Mourinho enkawl Roma hian Monza an lenchilh thung dawn, anni pawhin point thum hmu thei tur team an rem phawt a ngai ang.