US Open-ah Champion lai Nadal tel dawn lo

Rafael Nadal chuan US Open nomawi a kawl lai humhim tura inlan a tum loh thu a tichiang. Tun thla tawpa New York khawpuia a zin loh tur chhan hi Covid-19 vang a ni, hrileng hi an la thunun thei loah a ngai.

Mipa world number 1 Novak Djokovic leh Grand Slam vawi 23 champion tawh Serena Williams te erawhin tournament khelh tumin hming an pe lut thung. Hmeichhe zingah hian major title la tawh player 13 ngawt inlan turin an beisei mek.

January thla khan Australian Open khelh a ni a, hripui leng vangin Wimbledon chu khelh theih a ni lo. US Open hi August 31 aṭanga khelh tur niin, hri leng vanga khelh hun an sawn French Open chu September thla chawhnu lamah an khel ang.

World number 2 Nadal chuan, "Khawvel puma hri leng leh kan hriselna dinhmun hi hriatthiam a harsa rih hle. US Open khel lo tura thutlukna siam hi chu ka duh loh leh hreh tak chu a ni chiang hle.

"Mahse ka rilru chhung rilah hian inkhel lo mai tura duhna a awm, chumi chu ka zui a ngai. US Open buatsaihtu United States Tennis Association (USTA) leh ATP bakah fans zah hle mah ila thutlukna harsa tak hi siam a ngai," a ti.

Season hmasa khan Flushing Meadows-ah Nadal hian a vawi li nan nomawi a chawi a, Grand Slam title 19 a lak tlinna a ni chiah bawk. Kuminah erawh Nadal bakah Roger Federer chu hliam vangin a inlan thei dawn lo.

Covid-19 vangin March thla aṭang khan tennis tournament chawlh lailawk a ni, tun thlatir aṭang khan hmeichhe inelna erawh an nei ṭan leh tawh. Season tira an ruahman angin August 31 

aṭangin US Open hi khelh tum a ni.

Billie Jean King Tennis Centre-ah hian August 22 aṭangin Cincinnati Masters khelh a ni dawn, a hmun ngaiah hian thla tawp aṭangin US Open khelh a ni thung ang - player inlan tur ten dan leh hrai khirh tak zawm tur an neih a ngai dawn. Tournament pahnih hi a hmuna entu an awm dawn lo, inelna buatsaihtu USTA lamin player leh hna thawktu dang an him theih nan khauh takin hma an la dawn a, he an ruahmanna siam ṭhenkhat hian player-te zalenna a nekchep viau dawn niin a lang.

Rafael Nadal inkhelh thiamna ber chu clay court a ni. A hming lemah pawh 'King of Clay' tih a ni. September thla aṭang hian Italian leh Madrid Open khelh tur a awm dawn - inelna pahnih hi French Open inbuatsaihna tur a ni ang.

US Open khelin final hial thleng ta se, clay court-ah hahchawlhna hun nei loa a inlan a ngai dawn tihna a ni. Nadal hi kum 34 mi a ni tawh a, hun chep tak kara inelna hautak a indawta hmachhawn ai chuan Roland Garros atana insawrbing a duh niin a lang.

Nadal hian tournament ṭhenkhat a khelh loh tur thu a sawi tawh. Hard court-a inkhel thiam tawk loh vanga inhnukdawk, tia sawiselna a awm thei. Mahse, US Open-ah hian Djokovic (3 titles) aiin a champion hnem - player khel lai zingah Federer (5 titles) chauh a chungah a awm.